Xongkongdiki oqughuchilar namayishining yétekchiliri peyshenbe küni sotqa chiqirildi

Roytérs agéntliqining xewer qilishiche, 2014 -yili xongkongda yüz bergen “Merkezni ishghal qilish” oqughuchilar herikitining yétekchisi 19 yashliq jashwa wang peyshenbe küni xongkongda sotqa chiqirilghan. Sotta uninggha “ Qanunsiz yighilish qilish”jinayiti békitilgen. Wang bilen birge yene uning aléksandir chu we nétin isimlik qalghan ikki sepdishigimu oxshash jinayet békitilgen.

Xongkong sotining bu qarari kishilik hoquq organlirini narazi qildi. Xelq'ara kechürüm teshkilati bügün bayanat élan qilip, xongkong sotining qararini “Pikir erkinliki, yighilish we namayish qilish erkinlikige bérilgen bir zerbe” dep eyiblidi. Mezkur teshkilatning xongkongdiki shöbisining diréktori mabél aw bolsa “Xongkong da'iriliri ulargha yoqilang jinayetni artish arqiliq, siyasiy öch aldi” dégen. Biraq, xongkong sotining sotchisi jün chung sot qararining siyasiyliqini ret qilghan.

Jashiwa wang yétekchilikidiki oqughuchilar 2014 -yili béyjing hökümitining xongkongdiki tesirining küchiyip kétishige qarshi namayish bashlighan. 79 Kün dawam qilghan namayish axiri xongkong saqchi da'irilirining teripidin yash bomisi we shuningdek bashqa zorwan wasitilerni qollinishi astida tarqitiwétilgen hem heriketning lidirliri tutqun qilin'ghan idi.

Jashiwa wang bolsa sot qararidin kéyin muxbirlargha qilghan sözide, “Qandaq bedel tölishimizdin  qet'iynezer biz hökümetning bésimigha qarshi küresh qilimiz” dégen. U hazirche özlirining yuqiri sotqa erz sunush - sunmasliq heqqide qarar qilmighanliqini bildürgen.