Xongkong rayon bashliqi béyjingdin “Bir dölette ikki xil tüzüm bolush” qa kapaletlik qilishni telep qilghan

Roytérs agéntliqining xewer qilishiche, xongkong rayon bashliqi yéqinda béyjing da'irilirige mektup yollap, xongkongluq besh kitab sodigirining tutup kétilishi we ularning chong quruqluqta soraq qilinishining “Bir dölette, ikki xil tüzüm bolush” siyasitige xilap ikenlikini bildürgen we xongkong puqralirining qanuniy heq-hoquqlirigha kapaletlik telep qilghan.

Roytérsning xewiride eskertilishiche, xongkong rayon bashliqi lyang jénying mektupta otturigha qoyghan bu telipini xongkong mejlisidiki sözide tilgha alghan.

1997‏-Yili xongkong xitaygha qayturulghandiki wede boyiche xongkong ahalilirining mesililiri xongkongning yerlik asasiy qanuniy boyiche bir terep qilinishi kérek. Emma xitay dölet rehberliri heqqide kitab neshr qilghan 5 sodigerning xitay dölet bixeterlik xadimliri teripidin tutup kétilishi we ulardin xewer élinmasliqi xongkongluqlarni endishige salghan.

Bir türküm xongkongluqlar ötken shenbe küni bu heqte namayish ötküzüp, kawzibey kitabxanisidin béyjing ish béjirish ornigha qarap yürüsh qilghan we pikir we neshriyatchiliq erkinlikini qoghdashni telep qilip sho'ar towlighan.