Хоңкоңниң йеңи яш парламент әзалири парламентта “яшлиқ” ини көрситишкә башлиди

Мухбиримиз шөһрәт һошур
2016-10-12
Share

Бу йил сентәбирдә өткүзүлгән хоңкоң парламент сайлиминиң нәтиҗисидә, мустәқиллиқ тәрәпдари бир түркүм яшлар парламенттин орун алған иди.

Бүгүн хоңкоң парламентида өткүзүлгән қәсәм бериш мурасимида булар мурасимниң адитигә хилап һалда, өзлириниң җуңхуа хәлқ җумһурийитини халимайдиғанлиқи вә хоңкоң мустәқиллиқини арзу қилидиғанлиқидәк сиясий ирадисини ашкара вә йошурун шәкилләрдә ипадилигән.

Радикал “яш нәсилләр партийиси”дин болған вәкил сикстас луең қәсәм бәргәндә “хоңкоң хитай әмәс” дейилгән көкбайрақни қолида тутқан; униң сәпдиши яв вәйчуң бир қолида инҗилни тутуп һәм бармақлири билән кирист бәлгисини көрситип, хитай дөләт байриқидики оғақ болқиға қарши мәйданини ипадилигән.

Бирләшмә агентлиқиниң бүгүнки бу һәқтики хәвиридә йәнә баян қилишичә, парламентниң 23 яшлиқ, әң кичик әзаси натан лав мурасим қәсимини оқуштин аввал һиндистан мустәқиллиқиниң даһийси маһатма гәндийниң диктаторларға баш әгмәслик һәққидики бир мәшһур үзүндисини муқәддимә сүпитидә оқуған. Хәвәрләрдә йәнә дейилишичә, яш парламент әзалиридин бири қәсәмдики җуңхуа хәлқ җумһурийити дегән аталғуни интайин пәс авазда оқуш, йәнә бири 100 сөзгә йәтмәйдиған қәсәмнамини 10 минутқа созуп аста сүрәттә оқуш, йәнә бири болса “хитайниң инглизчә тәләппузини япончә кәмситиш тәләппузида шина дәп оқуш арқилиқ, өзлириниң хитай хәлқ җумһурийитигә садақити йоқлуқини ипадилигән.

Хоңкоң парламентида көрүлүп бақмиған бу әһвал мурасим башқурғучилирини қейин әһвалда қойған. Мәлум болушичә, хоңкоң асасий қанунида хоңкоңниң хитайниң бир қисми икәнлики баян қилинған болсиму, хоңкоң мустәқиллиқини муназирә қилишқа болидиған-болмайдиғанлиқи тилға елинмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт