хитай соти хоңкоңлуқ журналистларни қамақ җазасиға буйруди

хитай соти чаршәнбә күни икки нәпәр хоңкоңлуқ журналистни өз ичидә алған 4 кишини "қанунсиз сода қилиш җинайити" билән әйибләп, қамақ җазасиға буйруғанлиқини елан қилди.

ваң җйәнмин вә го җуңшяв исимлик бу журналистларниң һәр иккилиси хоңкоңда чиқидиған "асия һәптилики" журнилиниң хизмәтчилири болуп, улар 2014-йили шенҗенда тутуп кетилгән икән.

шенҗен соти ваң җйәнмингә 5 йил 3 айлиқ қамақ җазаси, го җуңшявға 2 йил 3 айлиқ қамақ җазаси бәргәндин сирт, уларниң һәр иккилисигә айрим-айрим 20 миң вә 50 миң сомдин җәриманә қойған.

мәлум болушичә, булар тутуп кетилиштин илгири өз алдиға "йеңи йол айлиқ журнили" вә "чирайлар" намлиқ икки парчә журнални чиқарған икән. сотта улар чиқарған нәшри буюмлири "қанунсиз нәшр буюмлири" дәп атилип, уларға бу журналларни хитай ичидики оқурмәнлиригә әвәтиш җинайити артилған.

әмма бирләшмә агентлиқида ваңниң адвокатиниң ейтқанлиридин нәқил елип хәвәр қилишичә, булар һәргизму өзлири чиқарған журналларға хәт арқилиқ муштәри қобул қилмиған яки хәт арқилиқ нәшр буюмлирини хитайға йоллимиған. бәлки улар илгири-кейин болуп 8 парчә журнални хитайдики достлириға әвәтип бәргән икән.
буларниң хоңкоң пуқраси яки әмәслики һазирчә ениқ әмәс болуп, мәзкур журналистларниң хитайда җазаға тартилиши йерим мустәқил хоңкоңдики ахбарат әркинлики мәсилисигә қара көләңгә ташлайдикән.

һалбуки, бу нөвәт юқириқи икки журналист билән биргә җазаға тартилған башқа икки нәпәр гумандарниң кимлики һәққидики хәвәрләр һазирчә толуқ әмәс.

мәзкурларниң түрмигә ташлиниши 5 нәпәр хоңкоңлуқ китаб содигәриниң туюқсиз йоқа кетип пәйда қилған ғулғула техи бесиқмиған мәзгилгә тоғра кәлди.

өткән йили юқири дәриҗилик хитай әмәлдарлириниң шәхсий һаяти һәққидә китаб нәшр қилип даң чиқарған хоңкоңдики тоңлувән китабханисиниң 5 хадими туюқсиз йоқап кетип, бир мәзгил өткәндин кейин хитайда телевизорға чиқирилип това қилдурулған иди.

хоңкоңлуқ китаб содигири лин руңҗин шуларниң бири. у, өткән ай қоюп берилгәндин кейин хитай даирилириниң йәнә тәһдит селишиға учриған иди.