Xotenning guma nahiyiside töt kadir jazalandi

Muxbirimiz ümidwar
2016.11.27


Xoten wilayitide bir qisim rehbiri kadirlar chiriklik qilmishi tüpeylidin jazalandi. Tengri tagh torining xewer qilishiche, bu qétimqi tekshürüp jazalash xotenning guma nahiyisige qaritilghan bolup, jazalan'ghanlar ikki xitay kadir we ikki Uyghur kadirdin terkip tapqan.

Uyghur aptonom rayonluq intizam tekshürüsh komitéti bu töt kishining ismi we qilmishliri heqqide melumat tarqatqan bolup, ularning üch nepiri guma nahiyisi köktérek yézisining kommunistik partiye kattiwashliri bolup, köktérek yéziliq partiye komitéti sékritari yang jünféngning qolgha keltürgen parixorluq sommisi besh milyon 700 ming som, köktérek yéza bashliqi we partkom mu'awin sékritari erkin maxmutning parixorluqqa munasiwetlik érishken sommisi besh milyon 500 ming som bolghan. Bular guma nahiyiside qattiq yer tewresh hadisisi yübergendin kéyin hökümetning yer tewreshtin mudapi'elinish üchün puqralargha öy sélip bérish pilani boyiche teminligen maliye chiqimlirini qaqti-soqti qilghan we bu jaydiki paxta üchün hökümet teminligen toluqlima pullardin 460 ming somni aldap éliwalghan.

Lékin, köktérek yézisida jazalan'ghan yene bir Uyghur kent rehbiri memet mexmutqa yang jünféng we erki maxmuttin perqliq jinayet artilghan bolup, memet maxmut: “Bölgünchilikke qarshi küreshtiki ikki yüzlük adem, u zorawanliq térrorluq pa'aliyetlirini qollighan, zorawan térrorchi unsurlargha yol qoyup kengchillik qilghan” dep eyiblen'gen. Démek, uning jazalinishi siyasiy tüs alghan.

Yang jünféng we erkin maxmut partiyidin qoghlap chiqirilghan we wezipisidin qaldurulghan, memet maxmutmu partiyisidin qoghlap chiqirilghan we bu üch kishi edliye organlirining bir terep qilishigha tapshurup bérilgen.

Jazagha uchrighanlar ichide guma nahiyilik ma'arip idarisining bashliqi dong changbin'gha yénikrek jaza bérilgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.