Xoten hawasi dunyaning eng éghir bulghan'ghan jaylirining birige aylinip qalghan

Uyghur élining qara qurum taghliri baghridiki qedimiy xoten rayoni, nöwette dunyadiki hawasi eng bulghan'ghan jaylarning birige aylinip qalghan. El jezire qanilining xewiride qeyt qilinishiche, buningdin 2 awwal élip bérilghan bir tekshürüshtin xotenning dunyadiki hawasi eng bulghan'ghan 100 sheherning birsi bolup chiqqanliqi melum bolghan. Nöwette, qara qurum taghlirining baghridiki bu xilwet qedimiy rayonning qandaq bolup dunyadiki hawasi eng bulghan'ghan 100 sheherning birige aylinip qalghanliqi so'al peyda qilmaqta. Amérika jorjitown uniwérsitétining tetqiqatchi, piroféssor jéymis milward 12-noyabir küni twittérda xotenning néme üchün bu halgha kélip qalghanliqigha so'al qoyghan.

U, buninggha “Nurghun meynet sana'etning (bu rayon'gha) yötkep kélinishi seweb boldimu? yaki issiqliq üchün yenila xam kömür qalinamdu? we yaki bu bir muhit ayrimichiliqi mesilisimu” dep sorighan. Xitayda chiqidighan “IQ” namliq hawa kilimat torining yéqinda bergen xewiridimu xotenning nopusi chong sheherlerningkidek köp bolmisimu, emma “2022-Yilliq yer shari hawa kilimat süpiti doklati” da uning yenila dunyadiki hawasi eng bulghan'ghan sheherlerning biri bolup bahalan'ghanliqi qeyt qilin'ghan. Yéqinqi bir yil mabeynide mezkur rayonning hawasida qanchilik özgirish bolghanliqi melum bolmisimu, emma yéqinqi 5-6 yildin béri xoten xitayning keng kölemde sana'et baghchilirini qurup, Uyghurlarni mejburiy emgekke tutush, muhitqa ziyanliq mehsulatlarni ishlepchiqirish bazilirining birige aylinip qalghan.

Amérika soda ministirliqi ilgiri xoten sana'et baghchiliridiki bezi xitay karxanilirigha Uyghurlarni mejburiy emgekke sélishi seweblik émbargo yürgüzgenidi. Xotenning hawasining ezeldin topa chang terkibi éghir bolsimu, lékin yéqinqi 5-6 yildin béri sana'et baghchilirining keng kölemde qurulushi, uning hawasini téximu nacharlashturup, dunyadiki hawasi eng éghir bulghan'ghan 100 sheherning birige aylandurup qoyghanliqi qeyt qilinmaqta. “El jezire” ning bildürüshiche, dunyadiki hawasi eng bulghan'ghan 100 sheherdin 94 sheher hindistan, xitay we pakistanda iken.