Хотән наһийисиниң тәвәккүл йезиси “ропашлиқ” аялларниң йүзини ечишни кадирларға көтүригә бәргән

Йеқинда хотән наһийисиниң тәвәккүл йезиси кәнт кадирлириға мәсулийәт тохтамнамиси имзалатқузуп, аялларниң “һиҗап”, “җилбаб” қатарлиқ диний әдәпкә лайиқ кийимләрни кийип йүрүшниң алдини елиш вә чәкләшкә капаләтлик қилишни тәләп қилған.

“уйғурбиз” ториниң ашкарилишичә, тәвәккүл йезиси чиқарған тохтамнамидә, “мән шундақ капаләт беримәнки, юқири дәриҗилик орунларниң ропаш, җилбаб кийиш һадисисиниң алдини елиш, чәкләш тоғрисидики һөҗҗәт мәзмунлириниң роһиға асасән динға рәһбәрлик қилиш гурупписиниң орунлаштурушиға аңлиқ бой сунимән” дейилгән.

Мәзкур тохтамнамә хәлқара диний әркинлик органлири хитайниң уйғур диний сияситини қаттиқ тәнқид қиливатқан мәзгилдә ашкариланди.

Йеқинда америка хәлқара диний әркинлик комитети доклат елан қилип, хитайниң уйғур диний турмушиға мудахилә қилиш, уларниң күндилик диний турмушини контрол қилиш һәрикити улар ойлиғандәк үнүм бәрмәй, әксичә уйғурларниң радикаллишишини кәлтүрүп чиқирилғанлиқини агаһландурған.

Бирақ, тәвәккүл йезисиниң тохтамнамисидә, кәнт кадирлири ропашлиқ аялларниң йүзини ачтурушқа, буниңдин кейин йүзини қайта йөгивалмаслиққа капаләтлик қилишқа вәдә бәргән.

Тохтамнамидә, әгәр юқириқи әһвал қайта садир болидикән, тәвәккүл йезилиқ динға рәһбәрлик қилиш гурупписиниң 2013 - йили 5 - номурлуқ һөҗҗитидики бир тәрәп қилиш тәдбиригә асаслинип, 500 сомға қәдәр мәсулийәтсизлик җәриманиси төләшкә, сиясий җәһәттә қаттиқ бир тәрәп қилинишқа рази икәнликини билдүргән.