Хотән даирилири хитайниң дөләт байримида дәм алмай йиғин ечип, хотәндики йезиларниң муқимлиқини сақлашни тәкитлигән.
Хотән гезитиниң хәвиридин қариғанда, хотән вилайитиниң партком секретари ню шөшиң 3-өктәбир сәйшәнбә күни хотән шәһиригә қарашлиқ бир қисим йеза-кәнтләрниң мәсул кадирлири билән йиғин ечип, бихәтәрлик хизмәтлирини қаттиқ күчәйтип, муқимлиқни қәтий сақлаш арқилиқ 19-қурултайниң мувәппәқийәтлик ечилишиға капаләтлик қилишни тәләп қилған.
Униң хитайда дөләт байрими дәм елиш мәзгилидә йәнә муқимлиқни тәкитләп йиғин чақириши диққәт қозғиди.
Хитайда дөләт байрими мунасивити билән әслидә 1-өктәбирдин 8-өктәбиргичә 8 күн дәм елиш елан қилинған.
Бирақ, уйғур районлуқ партком секретари чен чүәнгониң буйруқи билән дәм елиш бикар қилинип, уйғур елидики барлиқ дөләт ишчи-хизмәтчи, кадирлириниң иш орунлириға қайта йиғивелинғанлиқини хәвәр қилинған.
Юқиридики бу хәвәрму буниң тоғрилиқини дәлиллимәктә.
Хотән гезити бүгүнки хәвиридә йәнә, хотән вилайәтлик һөкүмәтниң террорлуқ-зораванлиқ вәқәлири һәққидә йип учи билән тәминлигәнләрни әң юқириси 5 милйон йүән билән мукапатлаш һәққидә бир қанчә ай аввал елан қилинған уқтурушини йәнә қайтидин җакарлиғанлиқини хәвәр қилди.
Көзәткүчиләр, чен чүәнгониң 19-қурултай ечилиш баһаниси билән уйғур елиниң сиясий атмосферасини нәпәс алғусиз дәриҗигә әкелип қоюватқанлиқини билдүрмәктә.
