En'gliye xitayning xu'awéy shérkitini resmiy tekshürüshke bashlidi

En'gliye da'iriliri éléktronluq uchur alaqe tori üsküniliri satidighan xitay shirkiti xu'awéy üstidin resmiy tekshürüsh bashlidi. Bu yil 6-ayda en'gliye parlaménti uchur we xewpsizlik hey'iti hökümetke doklat sunup, en'gliyediki nurghun muhim organlarning alaqe üskünilirini temin qiliwatqan xu'awéy shérkitini közdin kechürüp chiqishni telep qilghan idi.

Xu'awéy shirkiti xitay azadliq armiyisining pénsiyige chiqqan bir herbiy inzhénéri teripidin qurulghan bolup, bu shirketning xitay dölet organliri bilen bolghan munasiwiti guman qozghap kelgen. Amérikidiki xewpsizlik organliri we dölet mejlisi xu'awéy shirkitining xitaygha jasusluq qilish éhtimali barliqigha köp qétim tekshürüsh doklati élan qilghandin kéyin, amérikida xu'awéy shirkiti üstidin tekshürüshler élip bérilghan we bir qisim cheklimiler qoyulghan idi. Emma xu'awéy shirkiti bolsa özining xitay hökümitige jasusluq qilidighanliqi heqqidiki xewerlerni izchil ret qilip kelmekte.

Birleshme agéntliqining xewer qilishiche, xu'awéy shirkiti bügün en'gliyening qararigha qarita inkas qayturup, özlirining qararni qarshi alidighanliqini bildürgen we “Intérnét bixeterliki tedbirlirini ashurush istémalchilarning menpe'etige kapaletlik qilidu, shirkitimiz buni yéqindin qollaydu” dégen.