"Xitay yer shari téléwiziye qanili" üch elchini ziyaret qilip, Uyghur rayonidiki weziyet heqqide yalghan teshwiqat élip barghan

Muxbirimiz jewlan
2021-04-27
Share

"Xitay yershari téléwiziye qanili" torining 27-aprél chiqarghan widiyoluq xewirige qarighanda, mezkur téléwiziye qanilining riyasetchisi lyu shin pakistan, pelestin we süriyening xitayda turushluq elchilirini teklip qilip, ularni Uyghur rayonida körgen bilgenliri heqqide sözletken.

Bu programmining astidiki chüshendürüshte, yéqindin béri köpligen xelq'araliq ömek we diplomatlarning Uyghur rayonigha bérip "Emeliy tekshürüsh" te bolghanliqi, köpligen gherb siyasiyonliri we taratqulirining "Shinjangdiki az sanliq milletlerning iqtisad, medeniyet we ijtima'iy hoquqlardin behrimen boluwatqanliqini qesten körmeske séliwatqanliqi", shinjangda tekshürüshte bolghan bu üch diplomatning aghzidin gep anglisa ularning kallisida "Yéngi chüshenche" shekillinidighanliqi bildürülgen bolup, xitayning qaysi meqsette bu teshwiqatni élip bériwatqanliqi roshen körsitilgen.

Xitayning orunlashturushi boyiche Uyghur rayonida "Tekshürüshte bolghan" pakistan elchisi mu'in ulheq, pelestin elchisi ferz mehdawi, süriye elchisi imad mustafa qatarliqlar riyasetchi lyu shinning sorighan so'allirigha tamamen xitayning ümid qilghinidek jawab bergen bolup, hemmisi dégüdek Uyghur rayonining tereqqiyatidin zoqlan'ghanliqi, "Xitayning dunyawi tereqqiyatining bu rayonda toluq eks etkenliki, xelq turmushining normalliqi, meschit imamliri bilen körüshkenliki we musulmanlarning öz étiqadi boyiche yashawatqanliqi, özliri körgen ehwalning gherb metbu'atliri dégendek emesliki, gherb ellirining emeliyette xitaydiki tereqqiyatni körelmeywatqanliqi…" dégenlerni bayan qilghan.

Közetküchilerning qarishiche, pakistan, pelestin, süriye dégendek döletler xitaygha béqinip qalghan we izchil xitayni qollap kéliwatqan döletler bolup, bu döletlerning xitaydiki elchilirimu tamamen öz dölitining meydanigha wekillik qilidu we xitayning menpe'eti üchün xizmet qilidu. Xitay hökümiti ularni pilanliq orunlashturup köz boyamchiliq qilidu, yaxshi kütüp yolgha salidu we arqidin téléwizorgha chiqirip sözlitidu. Xitay bu arqiliq xelq'araning Uyghur mesilisige bolghan pikir yönilishini burmilashqa urun'ghan teqdirdimu, gherb elliride uning ünümi chaghliq. Xitayning meqsiti musulman ellerni bixutluqta qaldurush bolup, bu widiyo arqiliq xitaygha ishinishni xalaydighanlarni téximu ishendüridu we ularni gherb taratqulirigha ishenmeslikke chaqiridu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet