“тошиба” қатарлиқ японийә ширкәтлири хитайдин чекинип чиқмақтикән

Хитай иқтисадиниң йеқиндин буян чекинишкә йүзлиниватқанлиқи һәққидики хәвәрләр оттуриға чиқиватқанда “тошиба” вә “оки” қатарлиқ японийә ширкәтлириниң пат арида омумиййүзлүк хитай базиридин чекинип чиқидиғанлиқи мәлум болмақта.

TFIGlobal Хәвәрлири ториниң бу һәқтики мәлуматлирида ейтилишичә, японийә еликтир үскүнилири санаитидики гигантлардин болған “тошиба” ширкити өзлири 30 йил мәвҗут болған хитай базиридин чекинип чиқидиғанлиқини җакарлиған.

‍Уларниң далийән шәһридики завути бу йил сентәбирниң ахири тақилидиған болуп, уларниң йеқин кәлгүсидә хитайда қайта завут қуридиғанлиқи һәққидә һечқандақ учур йоқ икән. Ширкәтниң бу һәқтики баянатида: “ширкәт қурулмисидики өзгиришләр һәмдә мәһсулатларни тәминләш һалқилиридики мәсилиләр түпәйлидин биз бу қарарни елишқа мәҗбур болдуқ” дейлгән.

Мәлум болушичә, әйни вақитта далийән шәһриниң башлиқи болуп хизмәт қилған бо шиләй 1991-йили “тошиба” ширкитиниң далийән шәһридә иш башлишиға зор күч сәрп қилған икән.

Японийәдики аилә еликтир үскүнилири санаити билән шуғуллинидиған “‍оки” ширкитиму мушуниңға охшап кетидиған қарар алған һәмдә өзлириниң завутлирини шенҗен шәһридин тайландқа йөткәйдиғанлиқини билдүргән. Хәвәрдә ейтилишичә, 2020-йилиниң оттурисида японийә һөкүмити японийә ширкәтлирини хитайдин чекинип чиқишға керәклик болған икки милярд америка доллирилиқ көчүш мәблиғи билән тәмин әткән. Һазирғичә бу мәбләғни алған ширкәтләрдин 30 ширкәт хитайдин шәрқий-җәнубий асия әллиригә көчкән. Йәнә 57 ширкәт болса японийәгә қайтип кәлгән.

Мәлум болушичә, бу һал японийәниң сабиқ баш вәзири шензо абениң хитайни иқтисадий җәһәттин қисмаққа елиш истратегийәсиниң давамлишиши, дәп қаралмақта икән. Америка һөкүмитиму уйғур қирғинчилиқи һәққидики қарарни елан қилғандин кейин америка ширкәтлирини хитайдин шәрқий җәнубий асия яки латин америка тәвәсидә көчүшкә риғбәтләндүрүп кәлгән иди.