Yaponiye we en'gliye istratégiyelik shériklik derijisini kücheytidighan kélishim hasil qilghan

Muxbirimiz irade
2023.05.19

Yaponiye bilen en'gliye ikki döletning dölet mudapi'e, soda we téxnika hemkarliqini kücheytish üchün abide xaraktérlik kélishim hasil qilghan. Buning bilen ikki döletning hemkarliq munasiwiti yenimu küchiyip, yer shari istratégiyelik shériklik derijisige kötürülgen.

“Yaponiye waqti” gézitining xewer qilishiche, ikki dölet xiroshimada ötküzülidighan G-7 yighini bashlinishtin burun, yeni 19-may küni “Xiroshima kélishimi” imzalap, ikki terepning sana'et türliri, pen-téxnika we yérim ötküzgüch qatarliq sahelerde tetqiqat hemkarliqini kéngeytish, yéngiliq yaritishni kücheytishni otturigha qoyghan.

Xewerde déyilishiche, bu kélishim arqiliq ular dölet ichidiki özek ishlepchiqirish we teminlesh zenjirining berdashliq bérish iqtidarini kücheytishni meqset qilmaqtiken. Bolupmu bu kélishim teywen boghuzida yüz bergüsi herqandaq bir toqunushning dunyadiki yérim ötküzgüch teminatini aqsitip qoyushi mumkinliki heqqidiki endishini chiqish qilghan iken.

Yaponiye bash ministiri fumi'o kishida bilen en'gliye bash ministiri rishi sunak mezkur kélishim heqqidiki qoshma bayanatida mundaq dégen: “Ilim-pen, téxnika we yéngiliq yaritish saheliridiki dunyawiy bashlamchi bolush süpitimiz bilen, birlikte tiriship hem hemkarliship, sün'iy eqil, kiwant qatarliq yéngidin gülliniwatqan téxnikilarni, shundaqla yérim ötküzgüchke oxshash halqiliq sahelerni tereqqiy qildurimiz.”

Sunak yene en'gliyening yérim ötküzgüch sana'iti üchün 1 milyard fond-stérling (1 milyard 250 milyon dollar) meblegh sélishqa teyyarliq qiliwatqanliqini bildürgen.

Xewerde déyilishiche, bu kélishim yene ikki terepning dölet mudapi'e hemkarliqini kücheytishnimu öz ichige alidiken. Bu kélishim pat arida ötküzülidighan yaponiye-en'gliye birleshme manéwirida en'gliyening esker sanini köpeytidilidighanliqidin, shundaqla awiyamatkida zerbe bérish guruppisining 2025-yili hindi-tinch okyanda yene bir qétim manéwir xaraktérliq seper qilidighanliqidin dérek béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.