Yaponiye mudapi'e aq tashliq kitabi herbiyni kücheytishke chaqirdi

Yaponiye hökümiti jüme küni dölet mudapi'e doklati élan qilip, yaponiyening herbiy küchini kücheytishni, xitay we shimaliy koréyening tehditige taqabil turushni otturigha qoydi.

Doklatta, xitayning herbiy we déngizdiki herikiti rayon tinchliqi we muqimliqigha tehdit séliwatqanliqini tekitlep, “Xitayning herbiy yönilishi, xususen uning biperwaliq bilen qilghan heriketliri oylimighan hadisilerni keltürüp chiqirishi mumkin. Bu xelq'ara jem'iyet we yaponiye endishe qilidighan mesilige aylandi........Dölitimizning etrapidiki milliy bixeterlik weziyiti barghanche yamanlashmaqta” dep körsetken.

Analizchilarning qarishiche, eger yaponiye bu yolgha mangsa, bu uning mudapi'e siyasitidiki zor özgirish bolidu. Yaponiye 2‏-dunya urushidin kéyin, herbiy küchlirining chet'elde urush qilishini cheklep kelgen. Lékin bu qétimqi doklatta, yaponiye déngiz armiyisining quruqluqta urush qilish qisimlirini we ademsiz herbiy ayropilanlirini tereqqiy qildurushqa éhtiyajliq ikenliki bildürülgen.

Mezkur doklat élan qilin'ghan jüme küni, xitayning 4 déngiz qirghiqini charlash paraxoti yaponiye déngiz charlighuchi paraxotliri bilen sénkaku arili etrapida öz ‏-ara sürkilishken. Bu xitay déngiz qirghiqini charlash paraxotining tunji qétim yaponiye charlash paraxoti bilen sürkilish peyda qilishidur.