Японийә - русийә мудапиә вә ташқи ишлар министирлири токйода учрашти

Мухбиримиз үмидвар
2013-11-03
Share

Японийә - русийә мунасивәтлири тарихида тунҗи қетим русийә ташқи ишлар вә мудапиә министирлири билән японийә ташқи ишлар вә мудапиә министирлири тәң учришип, икки дөләтниң дипломатик вә һәрбий мунасивәтлирини муһакимә қилди.

Б б с агентлиқиниң йезишичә, мәзкур учришиш хәлқаралиқ диққәткә еришкән болуп, японийә телевизийилири вә башқа ахбарат васитилири русийә билән японийә мунасивәртлириниң йеқиндин буян тез сүрәттә тәрәққи қилишидики асаслиқ амилниң һәр иккила дөләтниң хитайниң баш көтүрүшини пайдисиз дәп қариғанлиқи, болупму, русийиниң хитайдин ибарәт зор нопусқа игә иқтисадий күчкә қарита хәтәр туйғусиниң давамлиқ күчийиватқанлиқиға бағлап тәһлил қилған.

Анализчилар русийиниң японийә билән болған һәмкарлиқни күчәйтишидики сәвәбниң президент путинниң тинч окян районида бирла җуңго билән һәмкарлишиш билән чәклинип қалмай ,техиму юқири истратегийилик тәңпуңлуқ яритиш ташқи сияситини йүргүзиватқанлиқи икәнликини илгири сүргән.

Русийиниң хәвәрләр агентлиқиниң йезишичә, бу учришишқа русийә ташқи ишлар министири лавров вә мудапиә министири шойгу қатнашқан.

Икки тәрәпниң сөһбитидә шәрқий асияниң бихәтәрлики, японийиниң өзини қоғдаш қисимлириниң русийә армийиси билән болған мунасивәтлирини күчәйтиш һәмдә бирликтә мәшиқ қилиш шуниңдәк деңиз - окян бихәтәрлики мәсилилирини музакирә қилинған.

Русийә мәтбуатлириниң йезишичә, русийә үчүн йәнә бир муһим нуқта русийиниң японийә билән болған иқтисадий мунасивәтлирини күчәйтиш арқилиқ йирақ шәрқ райониниң иқтисадий тәрәққиятини илгири сүрүштур. японийә үчүн муһим нуқта өзиниң араллар мәсилисидә хитай билән болған риқабәтлиридә русийиниң қоллишиға еришиш һәмдә совет иттипақи бесивалған төт арални қайтуривелиш мәсилисидә илгириләш һасил қилиштин ибарәт.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт