Уйғур қизи арфийә японийә авам палатасиниң әзалиқиға сайланди
2023.04.24
Японийә авам палатасиниң 23-април өткүзүлгән толуқлима сайлимида һакимийәт бешидики либерал демократлар партийәси тәрипидин намзатлиққа көрситилгән уйғур қизи арфийә абләт рәқиблирини йеңип, парламент әзалиқиға сайланған. У ғәрб дунясидики уйғурлардин чәт әл парламент әзалиқиға сайланған тунҗи уйғур болуп, униң японийә парламентиға кириши, уйғурларни “илһамландуридиған бир сияси һадисә” дәп қаралмақта.
Японийәдә арфийә ери (Arfiye Eri) дегән исим билән тонулған арфийә абләт, японийәниң чиба наһийәси 5-районида елип берилған толуқлима сайламда 50 миңдин артуқ авазға еришип, парламентқа киришкә мувәппәқ болған.
Японийә дөләтлик телевизийә қанили NHK ниң хәвәр қилишичә, чиба наһийәсиниң 5-районлуқ сайлими японийә либераллар партийәсидин болған сабиқ авам палата әзаси кентаро сонораниң “сиясәт вә пул” мәсилсии сәвәблик истипа бериши арқисида өткүзүлгән. Либерал демократлар партийәси арфийә ерини кентаро сонораниң орниға намзатлиққа көрсәткән. Сайлам җәрянида арфийә японийә баш министири кишиданиң қоллишиға еришкән.
Мәлум болушичә, 34 яшлиқ арфийәниң ата-аниси уйғур районидин японийәгә оқушқа берип қелип қалған болуп, у 10 яш вақтида японийә пуқралиқиға өткән икән. Униң илгири японийә банкиси, шундақла б д т ниң ню-йорктики баш штабиниң секритариятида хизмәт қилғанлиқи мәлум. Арфийә ери өткән қетим японийә кеңәш палатасиниң намзатлиқиға көрситилгән болсиму, лекин сайламда уталмиған иди. Әмма қетимқи сайламда йәттә намзат бир орунни талишип, арфийә ери риқабәтчилирини йеңип чиққан.
NHKНиң хәвиридә қәйт қилишичә, арфийә сайлам риқабитидә кишида һөкүмитиниң юқири мал баһасини һәл қилиш чақириқини қоллап, хәлқара вәзийәт муқимсизлашқан әһвалда бихәтәрлик сияситини давамлаштурушни, шәхсләр актип рол ойнайдиған бир җәмийәт бәрпа қилишни вә көп хиллиқ ичидә биргә турушни тәкитлигән.