Uyghur qizi arfiye yaponiye awam palatasining ezaliqigha saylandi

Yaponiye awam palatasining 23-april ‍ötküzülgen toluqlima saylimida hakimiyet béshidiki libéral démokratlar partiyesi teripidin namzatliqqa körsitilgen Uyghur qizi arfiye ablet reqiblirini yéngip, parlamént ezaliqigha saylan'ghan. U gherb dunyasidiki Uyghurlardin chet el parlamént ezaliqigha saylan'ghan tunji Uyghur bolup, uning yaponiye parlaméntigha kirishi, Uyghurlarni “Ilhamlanduridighan bir siyasi hadise” dep qaralmaqta.

Yaponiyede arfiye éri (Arfiye Eri) dégen isim bilen tonulghan arfiye ablet, yaponiyening chiba nahiyesi 5-rayonida élip bérilghan toluqlima saylamda 50 mingdin artuq awazgha ériship, parlaméntqa kirishke muweppeq bolghan.

Yaponiye döletlik téléwiziye qanili NHK ning xewer qilishiche, chiba nahiyesining 5-rayonluq saylimi yaponiye libérallar partiyesidin bolghan sabiq awam palata ezasi kéntaro sonoraning “Siyaset we pul” mesilsi'i seweblik istipa bérishi arqisida ötküzülgen. Libéral démokratlar partiyesi arfiye érini kéntaro sonoraning ornigha namzatliqqa körsetken. Saylam jeryanida arfiye yaponiye bash ministiri kishidaning qollishigha érishken.

Melum bolushiche, 34 yashliq arfiyening ata-anisi Uyghur rayonidin yaponiyege oqushqa bérip qélip qalghan bolup, u 10 yash waqtida yaponiye puqraliqigha ötken iken. Uning ilgiri yaponiye bankisi, shundaqla b d t ning nyu-yorktiki bash shtabining sékritariyatida xizmet qilghanliqi melum. Arfiye éri ötken qétim yaponiye kéngesh palatasining namzatliqigha körsitilgen bolsimu, lékin saylamda utalmighan idi. Emma qétimqi saylamda yette namzat bir orunni taliship, arfiye éri riqabetchilirini yéngip chiqqan.

NHKNing xewiride qeyt qilishiche, arfiye saylam riqabitide kishida hökümitining yuqiri mal bahasini hel qilish chaqiriqini qollap, xelq'ara weziyet muqimsizlashqan ehwalda bixeterlik siyasitini dawamlashturushni, shexsler aktip rol oynaydighan bir jem'iyet berpa qilishni we köp xilliq ichide birge turushni tekitligen.