Дуня уйғур қурултйии рәһбири японийәни “қуруқ вәдиси” ни аз қилип әмили иш қилишқа чақирған

Мухбиримиз әркин
2022.09.30
Share on WhatsApp
Share on WhatsApp

Японийәни зиярәт қиливатқан дуня уйғур қурултийиниң рәиси долқун әйса, 30-сентәбир японийә хәлқара мухбирлар кулубида ахбарат йиғини өткүзүп, японийәни хитайниң уйғур ирқий қирғинчилиқини тохтишишта “қуруқ вәдини аз қилип, көпрәк әмәлий һәрикәт қилиш” қа чақирған. Ройтерс агентлиқиниң хәвәр қилишичә, долқун әйса өзиниң японийәгә парламент әзалири билән көрүшүш вә һөкүмәтни б д т кишилик һоқуқ кеңишидики хитайниң уйғурларға тутқан муамилисигә аит муназиригә қатнишишиға чақириш үчүн кәлгәнликини ейтқан.

У мухбирларға японийәниң бу мәсилидики қарарлири вә баянатлириниң “қуруқ вәдә болуп, ирқий қирғинчилиқни тохтишишта йетәрлик әмәслики” ни билдүргән. Хәвәрдә униң мундақ дегәнликини билдүрди: “японийә парламентиниң уйғур ирқий қирғинчилиқиға қарита техиму актип һәрикәт қилиш мәсулийити бар”.

Ройтерсниң ейтишичә, долқун әйса йәнә дуня уйғур қурултийиниң америка, әнглийә вә башқа дөләтләрниң уйғур мәсилисини б д т кишилик һоқуқ кеңишидә музакирә қилиш тәклипиниң қоллашқа еришиши үчүн дунядики һәрқайси җайлирида һәрикәт қиливатқанлиқини ейтқан.

Дуня уйғур қурултийиниң долқун әйса башчилиқидики 4 кишилик бир өмики ‍өткән һәптә японийәгә йетип кәлгән. Уларниң японийә зиярити америка, әнглийә қатарлиқ дөләтләрниң сунған тәклипи келәр һәптә б д т кишилик һоқуқ кеңишидә авазға қоюлидиған бир пәйттә елип берилған.

Мәлум болушичә, уйғур мәсилиси б д т кишилик һоқуқ кеңишиниң келәр йили 1-айдики йиғинида музакирә қилиниши үчүн тәклип лайиһәси қаттиқ бөлүнүшкә кирип қалған кишилик һоқуқ кеңишидә келәр һәптә көп санлиқ авазниң қоллишиға еришиши керәк икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.