Kishida hökümiti ittipaqdashlirini xitaygha qarshi ortaq herikette bolushqa chaqirdi

Roytérs agéntliqining 13-yanwardiki xewiride éytilishiche, yaponiye bash ministiri fumi'o kishida (Fumio Kishida) öz ittipaqdashliri bolghan amérika qoshma shtatliri we yawropa ittipaqini xitay mesiliside bir yaqidin bash chiqirishqa dewet qilghan.

Xewerde éytilishiche, shu küni kishida ziyaret üchün washin'gton shehirige kelgen bolup, jon xopkinis uniwérsitétida nutuq sözligen hemde xitayning yaponiye we amérika üchün oxshashla xiris peyda qiliwatqanliqini tekitligen. U nutqida éniq qilip: “Hazir yaponiye, amérika we yawropa üchün birliship xitay bilen bolghan munasiwetni bir yaqliq qilishning peyti yétip keldi” dégen.

U aqsarayda amérika prézidénti jow baydén bilen körüshkendimu mushu xildiki mewqesini ipadilep: “Hazir xelq'ara jem'iyet üchünmu bir tarixiy burulush nuqtisi bolup qéliwatidu. Biz yillardin buyan ejir singdürüp kelgen ochuq, erkin we muqim bolghan xelq'ara tertip hazir zor xeterge duch kéliwatidu” dep tekitligen.

Kishida alahide körsitip ötken nuqtilarning biri xitay hökümitining sénkaku (Senkaku) arili etrapidiki herbiy ighwagerchiliki bolup, bu halning yalghuz yaponiyege qaritilghan ehwal emeslikini alahide sherhlep ötken. Shu sewebtinmu yaponiye hökümiti 70 yil dawam qilghan herbiysizleshtürüshke xatime bérip 2022-yilidin tartip zor kölemde armiye qurushqa kirishkenidi.