Yaponiye xitaydiki rusiyening ukra'ina urushini qollighan shirketlerge soda cheklimisi qoydi

Yaponiye tashqi ishlar ministirliqi 21-iyun jüme küni bayanat élan qilip, xitaydiki rusiyening ukra'ina urushini qollighan shirketlerge soda cheklimisi qoyghanliqini jakarlighan. Bayanatta qeyt qilinishiche, bu, rusiyening ukra'inagha qoralliq tajawuz qilishini qollighan shexs we guruppilargha qarita yürgüzülgen bir qatar yéngi émbargo tedbirlirining bir qismi iken. Lékin xewerlerde bu yéngi émbargo tedbirining hindistan, özbékistan we qazaqistan shirketlirinimu öz ichige alghanliqi qeyt qilinmaqta. Roytérs agéntliqining bildürüshiche, bu, yaponiyening xitaydiki ukra'ina urushigha chétishliq shirketlerge qarita tunji qétim émbargo yürgüzüshi iken.

Bu yilning bashlirida élan qilin'ghan bezi doklatlarda, xitayning Uyghur diyari arqiliq rusiyege mal éksport qilishta qazaqistan, özbékistan, qirghizistan qatarliq döletlerning wasitichilik qiliwatqanliqi ilgiri sürülgen. Xitay tamozhna sanliq melumatlirida, Uyghur élining ottura asiya jumhuriyetlirige chiqarghan éksporti ötken yili we bu yilning deslepki charikide shiddetlik artqanliqi élan qilin'ghan.

Roytérs agéntliqining bildürüshiche, yaponiye émbargo yürgüzgen xitaydiki bu shirketler xongkongni baza qilghan “Asiya-tinch okyan ulinish cheklik shirkiti”, xitayni baza qilghan “Yilufa éléktironluq cheklik shirkiti” qatarliqlarni öz ichige alghaniken. Yaponiyening soda émbargosi yaponiye shirketlirining bu karxanilar bilen soda qilishinimu chekligen.

Amérika hökümet emeldarliri xitayning rusiyeni uchquchisiz ayropilan, bashqurulidighan bomba téxnikisi qatarliqlar bilen teminlep, uning ukra'ina urushigha yardem qiliwatqanliqini agahlandurup kelgen. Amérika hökümiti ötken hepte rusiyege qaratqan émbargoni kéngeytken, bu émbargo xitaydiki moskwagha yérim ötküzgüch sétiwatqan shirketlernimu nishan qilghanidi.