Yaponiye xitayning herbiy tehditige qarshi qorallinish qedimini tézletken

Roytérs agéntliqi 19-öktebir küni analiz maqalisi élan qilip, yaponiyening 2027-yilini we xitayning teywen'ge qoramliq hujum qilish xewpini közde tutup, qayta qorallinish qedimini tézletkenlikini bildürdi. Roytérs agéntliqining yaponiye hökümet emeldarliri we bixeterlik analizchiliridin neqil keltürüshiche, yaponiye xitay kompartiyesining béyjingda échiliwatqan 20-qurultiyi bilen 2027-yili ‍échilidighan 21-qurultiyighiche bolghan 5 yilda, xitayning sherqiy asiyada urush qozghishigha qarshi 2-dunya urushidin buyanqi eng chong qorallinishni bashlighan.

Maqalida, yaponiyening 2019-yilliq mudapi'e aq tashliq kitabida xitayni özining asasliq reqibi dep békitkenliki, béyjingning xelq'ara tertipke xilapliq qilishi, teywen'ge bolghan bésimi we uning herbiy zamaniwilashturushi jiddiy bixeterlik endishisi peyda qilghanliqi'i bildürülgen.

Roytérs agéntliqining tekitlishiche, rusiyening ukra'inagha qoralliq hujum qilishi bu endishini téximu kücheytip, yaponiye jama'et pikirining qayta qorallinishqa bolghan qarshiliqini peseytken. Roytérs agéntliqi yaponiyelik mutexessislerning 2027-yili sherqiy asiyadiki küchler tengpungluqi xitayning paydisigha özgirishi mumkin, shunga yaponiye hökümiti mudapi'e chiqimini téximu köpeytidu, dep éytqanliqini bildürgen.

Maqalida, 2027-yili xitay kompartiyesi wekillirining béyjinggha qayta yighilipla qalmay, bu yene xitayning herbiy zamaniwilashturush yol xeritisi we xitay azadliq armiyesi qurulghanliqigha 100 yil bolghan muhim basquch ikenliki, amérika hindi-tinch okyan qisimlirining qomandani, admiral filip deywitsonning shu yili xitayning teywen'ge bolghan tehditi “Mu'eyyenlishidu” dégenliki bildürülgen. Roytérs agéntliqining maqalisi amérika tashqi ishlar ministiri blinkénning xitayning teywen'ge hujum qilishi burun oylighandinmu téz bolushi mumkinlikini bildürüshining arqisidinla élan qilindi. Blumbérg agéntliqining xewer qilishiche, blinkén 17-‍öktebir küni xitayning teywenni ilgiri oylighandinmu “Tézrek waqitta” igileshni qarar qilghanliqini bildürgen.