Хитай ахбарат васитилири һөкүмәтни японийә айропиланлириға қарши тәдбир елишқа чақирди

Хитай һөкүмәт ахбарати җүмә күни әгәр японийә хитайниң һава мудапиә кимлик райониға кирсә, һөкүмәтни иккиләнмәй мудахилә қилишқа чақирди.

Хитай “йәршари вақти гезити” җүмә күни баш мақалә елан қилип: “японийә җуңго йеқинда елан қилған һава мудапиә кимлик райониға риқабәт елан қилса, биз иккиләнмәй униңға қарши дәрһал тәдбир елишимиз керәк” дегән вә хитайниң һәрбий айропилан чиқирип, японийә айропиланлирини тосушни тәләп қилған.

Хитай йеқинда сенкаку араллирини өз ичигә алған шәрқий деңиз һава бошлуқини өзиниң һава мудапиә кимлик райони елан қилған.

Бирақ, японийә, җәнубий корейә буни етирап қилмайдиғанлиқини билдүргән. Америка сәйшәнбә күни өзиниң икки б-52 типлиқ истратегийилик бомбардиманчи айропиланини бу районда учурған. Хитай шу вақитниң өзидә һечқандақ тивиш чиқармиған иди.

У пәйшәнбә күни уруш айропиланлириниң чарлаш елип барғанлиқини елан қилип, тәдбир алғанлиқини билдүргән болсиму, бирақ немә үчүн шу вақитниң өзидә инкас қайтурмиғанлиқиға чүшәнчә бәрмигән.

Японийә “юмиури шинбон гезити” ниң хәвәр қилишичә, америка билән японийә районда һәрбий һәмкарлиқни күчәйтишкә келишкән.

Җүмә күни йәнә хитайни явропа иттипақи тәнқид қилди. явропа иттипақи ташқи ишлар комиссари кәтерн әштон, хитайниң һәрикити “районда җиддийликни күчәйтишкә түрткә болғанлиқи” ни билдүргән.