Xitay da'iriliri Uyghur diyarida "Yataqliq mektep" tüzümini omumlashturmaqta

Muxbirimiz sada
2019-07-17
Élxet
Pikir
Share
Print

Uyghur diyaridin ikki milyondin artuq Uyghur we bashqa yerlik milletler jaza lagérlirigha solan'ghanliqi ilgiri sürülüwatqan mezgilde xitay da'iriliri Uyghur aptonom rayonining herqaysi yéza-bazar rayonlirida "Yataqliq mektep" tüzümini omumlashturmaqtiken.

"Tengritagh" torining 17-iyuldiki xewirige qarighanda Uyghur aptonom rayonluq ma'arip nazariti "Yataqliq mektep qurush ölchimi" heqqide bir uqturush tarqatqan. Uqturushta Uyghur diyarining herqaysi yéza-bazarliridiki yataqliq mekteplerni qurushni omumyüzlük tézleshtürüsh nishan qilin'ghan.

Uqturushtin melum bolushiche, bashlan'ghuchning 1-3-yilliqighiche bolghan balilar mektep yatiqida yatmay öyidin qatnap oqusa bolidiken. 4-6-Yilliqqiche bolghan balilardin shara'iti yar bergenler yataqta yétip turup oqusa bolidiken. Toluqsiz otturida oquydighanlar choqum mektep yatiqida yétishi kérek iken.

Xewerde yataqliq mekteplerning ichide oqutush binasidin bashqa yene herxil pa'aliyetlerni élip baridighan jaylarni öz ichige alghan toluq eslihelen'gen bir jay ikenliki déyilgen.

Yéqinda b b k tori élan qilghan bir widiyoluq xewerde nechche minglighan Uyghur balilirini

Sighduralaydighan yataqliq mekteplerning jaza lagérlirining yénigha sélin'ghanliqi ashkarilan'ghanidi.

Uningdin bashqa ötken mezgilde wike torining muxbiri isabil yong Uyghur diyarining qeshqer we xoten shehiride ziyarette bolghan. Bu jeryanda yesli we bashlan'ghuchta oquydighan Uyghur balilarning shenbe-yekshenbidimu öyige qaytmaydighanliqini körgen. Tehlilchilerning déyishiche, isabil yongning rayonda körgenliri emeliyette yuqirida déyilgen "Bashlan'ghuchning 1-3-yilliqighiche bolghan balilar mektep yatiqida yatmisimu bolidu" dégen mezmun'gha qarmu-qarshi kélidiken.

Analizchilar, xitay hökümitining Uyghur diyarida yataqliq mektep tüzümini yolgha qoyushi bir jehettin Uyghur a'ililerni parchilash bolsa, yene bir jehettin Uyghur balilirini kichikidin bashlapla öz milliy kimlikini yoqitishqa qarap yüzlendürüshning bir yoshurun urunushidur, dep texmin qilmaqta.

Toluq bet