Явропа иттипақи хитай ширкәтлирини русийәгә ярдәм бәргәнлики үчүн җазалашни пилан қилған

Вашингтондин мухбиримиз уйғар тәйярлиди
2024.02.14

Явропа иттипақи украинадики урушниң 2 йилға йеқинлишишиға әгишип, хитай вә башқа дөләтләрниң ширкәтлиригә тунҗи қетим җаза беришни оттуриға қойған.

Американиң “сиясәт” (политичо) журнилиниң 2024-йили 2-айниң 13-күндики мәхсус хәвиригә асасланғанда, явропа иттипақи тунҗи қетим хитай, түркийә, һиндистан вә сербийә қатарлиқ дөләтләрниң ширкәтлирини җазалашни пиланлиған.

Мәзкур мақалидә дейилишичә, явропа иттипақи хитай рәиси ши җинпиң билән русийә президенти виладимир путин мәзкур икки диктатора түзүм оттурисидики “чәксиз достлуқ” ни җакарлиғандин буян, хитайниң русийәниң украинаға таҗавуз қилишиға қандақ ярдәм қиливатқанлиқи тоғрисидики учурларни йиғишқа башлиған.

Явропа иттипақи, тәклип лайиһәсигә асасән русийәгә ярдәм бериватиду дәп қарилидиған төт хитай ширкитини җазалашқа тәйярлиқ қилмақтикән. Буниңда явропа ширкәтлириниң бу хитай ширкәтлири билән алақә қилиши чәклинидикән.

Кийев иқтисад институтиға мунасивәтлик ақиллар амбириниң тәтқиқатида оттуриға қоюлушичә, һазир хитай вә хоңкоңдики ширкәтләр ғәрбниң җазасиға учрайдиған “җәң мәйдани техникиси” ни тошуштики әң муһим васитичи икән.

Бу йеңи тәклипкә асасән, явропа иттипақидики 27 һөкүмәт мәзкур җаза пиланиға қошулса, явропа иттипақи тунҗи қетим хитай ширкәтлирини очуқ-ашкара җазалиялайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.