Явропа иттипақи хитай һөкүмитини "деңиз тәһдити" пәйда қилишта әйиблиди

Мухбиримиз әзиз
2021-04-26
Share

Хитай һөкүмитиниң җәнубий хитай деңизи тәвәсидә земин дәваси қилиши һәмдә район бихәтәрликигә тәһдит пәйда қиливатқанлиқи явропа иттипақиниң 25-апрелдики баянатида алаһидә орун алди.

Ройтерс агентлиқиниң бу һәқтики хәвиридә ейтилишичә, җәнубий хитай деңизи әтрапидики дөләтләр хитай һөкүмитиниң пүткүн җәнубий хитай деңизини хитай територийәси дәвелишидин еғир тәһдиттә қалғанлиқини билдүргән. Филиппин һөкүмити өткән һәптә хитай белиқчилиқ кемилириниң хитай һөкүмити "нәнша тақим араллири" дәп исим қоювалған даиридики қанунсиз белиқ тутушини буниңға мисал қилип көрсәткән. явропа иттипақи бу һәқтә баянат елан қилип "җәнубий хитай деңизидики бу хил қилмишлар рошәнки мәзкур районниң тинчлиқи вә муқимлиқи үчүн еғир тәһдит пәйда қилиду," дегән.

Әмма хитай ташқий ишлар минситирлики бу пикиргә қарши туридиғанлиқини билдүрүп: "нәнша тақим араллири бизниң земинимиз. У җайда белиқ тутуш биз үчүн қанунлуқ," дегән. Әмма хәлқара қаидиләр бойичә деңиз билән чегралинидиған дөләтләрниң деңиздики земин тәвәлики 22 километир (тәхминән 14 мил) болуп, хитай дәва қиливатқан територийә буниңдин ғайәт зор дәриҗидә һалқип кәткән икән.

Мәлум болушичә, йеқиндин буян явропа иттипақи билән хитай оттурисидики зиддийәт барғансери юқур пәллигә чиқиватқан болуп, анализчилар буни америка һөкүмитиниң явропа билән "һәмкарлашқан асаста" хитай мәсилилирини бир яқлиқ қилишиниң нәтиҗиси, дәп қаримақта икән. Йәнә келип америка ташқий ишлар министири антоний билинкин әпәнди өткән һәптә "биз филиппин тәрәптә" дәп ашкара ипадә билдүргән икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт