Yawropa ittipaqi xitay hökümitini “Déngiz tehditi” peyda qilishta eyiblidi

Xitay hökümitining jenubiy xitay déngizi teweside zémin dewasi qilishi hemde rayon bixeterlikige tehdit peyda qiliwatqanliqi yawropa ittipaqining 25-apréldiki bayanatida alahide orun aldi.

Roytérs agéntliqining bu heqtiki xewiride éytilishiche, jenubiy xitay déngizi etrapidiki döletler xitay hökümitining pütkün jenubiy xitay déngizini xitay téritoriyesi dewélishidin éghir tehditte qalghanliqini bildürgen. Filippin hökümiti ötken hepte xitay béliqchiliq kémilirining xitay hökümiti “Nensha taqim aralliri” dep isim qoyuwalghan da'iridiki qanunsiz béliq tutushini buninggha misal qilip körsetken. Yawropa ittipaqi bu heqte bayanat élan qilip “Jenubiy xitay déngizidiki bu xil qilmishlar roshenki mezkur rayonning tinchliqi we muqimliqi üchün éghir tehdit peyda qilidu,” dégen.

Emma xitay tashqiy ishlar minsitirliki bu pikirge qarshi turidighanliqini bildürüp: “Nensha taqim aralliri bizning zéminimiz. U jayda béliq tutush biz üchün qanunluq,” dégen. Emma xelq'ara qa'idiler boyiche déngiz bilen chégralinidighan döletlerning déngizdiki zémin teweliki 22 kilométir (texminen 14 mil) bolup, xitay dewa qiliwatqan téritoriye buningdin ghayet zor derijide halqip ketken iken.

Melum bolushiche, yéqindin buyan yawropa ittipaqi bilen xitay otturisidiki ziddiyet barghanséri yuqur pellige chiqiwatqan bolup, analizchilar buni amérika hökümitining yawropa bilen “Hemkarlashqan asasta” xitay mesililirini bir yaqliq qilishining netijisi, dep qarimaqta iken. Yene kélip amérika tashqiy ishlar ministiri antoniy bilinkin ependi ötken hepte “Biz filippin terepte” dep ashkara ipade bildürgen iken.