Явропа иттипақи мәҗбурий әмгәк билән ишләпчиқирилған мәһсулатларни чәкләш һәққидики сода көрсәтмисини мақуллиған

Мухбиримиз ирадә
2022.06.09
Share on WhatsApp
Share on WhatsApp

Бүгүн, йәни 9-июн күни явропа парламенти хитай һөкүмитиниң уйғурларға қарита “инсанийәткә қарши җинайәт” йүргүзиватқанлиқи вә “ирқий қирғинчилиқ хәвпи” шәкилләндүрүватқанлиқини җакарлиди. Бүгүн йәнә явропа парламенти мәҗбурий әмгәк билән ишләпчиқирилған мәһсулатларниң явропа базириға киришини чәкләш тоғрисида бир йеңи сода көрсәтмисини мақуллиди.

Мәзкур сода көрсәтмиси мақуллиништин бурун, йәни 7-июн күни явропа иттипақида “шинҗаңдики мәҗбурий әмгәк” темисида бир испат аңлаш йиғини ечилған иди. Бу йиғинда уйғур ирқий қирғиғчилиқи мәсилиси бойичә тонулған тәтқиқатчи адриян зенз гуваһлиқ бәргән. явропа парламентида уйғур мәсилиси үчүн изчил күч чиқириватқан парламент әзалири рафаел гилуксман (Raphael Glucksmann), әнгин әроғлу (Engin Eroglu) вә шундақла дуня уйғур қурултийиниң рәиси долқун әйса қатарлиқларму қатнашқан бу йиғинда, тәтқиқатчи адриян зенз хитай һөкүмитиниң уйғурларни кәң көләмлик мәҗбурий әмгәкчиләргә айландуруши вә бу сияситини йәниму күчәйтип давам қилиш пилани һәққидә тәпсилий мәлумат бәргән.

Явропа иттипақиниң мәҗбурий әмгәк мәһсулатлирини чәкләш тоғрисидики бу йеңи сода көрсәтмиси, хитай һөкүмитигә уйғурларға йүргүзүватқан ирқий қирғинчилиқи вә мәҗбурий әмгәк сиясити сәвәблик бәлгилик бир иқтисадий зиян пәйда қилишта интайин муһим қәдәмләрниң бири болуп һесаблинидикән.

Дуня уйғур қурултийи бу һәқтики баянатида явропа иттипақиниң бу йеңи сода көрсәтмисини қарши алған вә буни “америкада 21-июн күнидин башлап рәсмий ишқа киришидиған ‛уйғур мәҗбури әмгикиниң алдини елиш қануни‚ билән бирликтә, уйғур мәҗбурий әмгикигә қарши бир туташ һәрикәт қоллиништа интайин муһим әһмийәткә игә,” дәп көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт