Явропа иттипақи парламенти мәҗбурий әмгәктин пайдилинип ишләпчиқирилған мәһсулатларни чәкләшни қарар қилған

Вашингтондин мухбиримиз уйғар тәйярлиди
2024.04.23

Явропа парламенти 555 нәпәр парламент әзасиниң қоллиши билән мәҗбурий әмгәк мәһсулатлирини чәкләшни қарар қилған.

Фирансийә 24 қанилиниң 4-айниң 23-күнидики хәвиригә асасланғанда, явропа иттипақи парламент әзалири сәйшәнбә күни беләт ташлап мәҗбурий әмгәктин пайдилинип ишләпчиқирилған мәһсулатларни чәкләшни қарар қилған. Шуниң билән бир вақитта бу қарарниң явропа иттипақиниң хитай билән болған мунасивитидә җиддийлик кәлтүрүп чиқириш хәвпиниң барлиқи илгири сүрүлгән.

Гәрчә бу қарар хитайни биваситә тилға алмисиму, әмма нурғун парламент әзалири буниң уйғур мәҗбурий әмгикигә четишлиқ мәһсулатларни хитайдин импорт қилишни чәкләштә муһим роли болидиғанлиқни тилға алған.

Явропа парламентидики 555 парламент әзасиниң қоллиши билән мақулланған бу қанун явропа иттипақиға әза 27 дөләтниң тәстиқидин кейин рәсмий күчкә игә болидикән.

Ройтерс агентлиқиниң бу һәқтики хәвиридә ейтилишичә, бу қанун күчкә игә болса явропа иттипақиға әза дөләтләрниң һошярлиқини өстүрүп, уларниң мәҗбурий әмгәк күчлирини ишләткән ширкәтләр вә уларниң мәһсулатлирини чәкләштики мәсулийәтлирини тонушиға түрткә болидикән.

Явропа иттипақиниң мәҗбурий әмгәк мәһсулатлирини чәкләш қанунида уйғур мәҗбурий әмгики алаһидә тилға елинмиған болсиму, шундақла бу қанун америкиниң “уйғур мәҗбурий әмгикиниң алдини елиш қануни” дәк күчлүк қаратмилиққа игә дәп қаралмисиму, бирақ бу қанунниң йәнила уйғур мәҗбурий әмгики мәһсулатлирини чәкләштә муһим рол ойнайдиғанлиқи илгири сүрүлмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.