Yawropa ittipaqi bilen nato birleshme bayanat élan qilghan

Yawropa ittipaqi bilen nato (shimaliy atlantik döletler ehdi teshkilati) 10-yanwar küni rusiye we xitaydin kéliwatqan tehditlerge qarshi birleshme bayanat élan qilghan.

Yawropa ittipaqi komitéti tor bétide élan qilin'ghan bu bayanatta, yawropa ittipaqi bilen natoning oxshash qimmet qarash, oxshash menpe'et üstide ikenliki, yawropa we shimaliy atlantik rayoni döletlirining tinchliqi, erkinliki we güllinishi üchün ortaq tirishchanliq körsitidighanliqi bildürülgen.

Bu bayanatta rusiyedin kéliwatqan tehdit alahide tekitlen'gen bolup, “Rusiye ukra'inadiki urushni derhal toxtitip, u yerdin eskerlirini chékindürüshi kérek” déyilgen؛ andin ukra'inaning musteqilliqi we zémin pütünlükini qoghdash üchün ulargha dawamliq yardem béridighanliqi bildürülgen.

Bu bayanatta yene rusiye prézidénti putin'gha oxshash mustebit küchlerning siyasiy, iqtisadiy, herbiy we téxnika wasitiliridin paydilinip, gherb ellirining menpe'eti, qimmet qarishi we démokratiyesige buzghunchiliqi qiliwatqanliqi körsitilgen, andin xitayning barghanséri küchiyiwatqan xetiri tilgha élinip: “Biz hazir istratégiyelik riqabet künséri küchiyiwatqan dewrde yashawatimiz. Xitayning barghanche küchiyiwatqan qattiq qol pozitsiyesi we siyasiti bizge xiris élip kéliwatqanda, bizmu uninggha taqabil turushimiz kérek” déyilgen.

Bu bayanatning axirida yawropa ittipaqi bilen natoning hemkarliqini chongqurlashturush, yawropa ittipaqi we natogha eza döletlerning dölet mudapiyesi sana'itini güllendürüsh, déngizda birleshme jeng qilish, birleshme herbi maniwér ötküzüsh, térrorluqqa qarshi turush jehetlerde yéngi netijilerge érishish pilani otturigha qoyulghan.