Кишилик һоқуқ тәшкилатлири явропа иттипақи рәһбәрлирини ярвропа-хитай башлиқлар сөһбитидә кишилик һоқуқни музакирә қилишқа чақирди

Мухбиримиз әркин
2022.03.18
Share on WhatsApp
Share on WhatsApp

Дуня уйғур қурултийи, кишилик һоқуқни көзитиш тәшкилати, хәлқара кишилик һоқуқ федератсийәси қатарлиқ 10 дәк тәшкилат явропа иттипақи рәһбәрлиригә хәт йезип, хитай билән болған кишилик һоқуқ диалогини тохтитишни, 1-‍апрел күни өткүзүлидиған хитай-явропа иттипақи башлиқлар йиғинида хитайдики кишилик һоқуқ дәпсәндичиликини музакирә қилишни тәләп қилған.

Явропа комиссийәси президенти ‍урсула фон дер лейен, явропа кеңишиниң президенти чарлис мекил, ташқий ишлар алий комиссари җосеф борелға йезилған хәттә, явропа иттипақиниң хитайдики кишилик һоқуқ кризисигә қарита бир қатар тәдбирләрни қолланған болсиму, бирақ униң тәдбирлири “бу киризисниң еғирлиқиға нисбәтән мас кәлмигәнлики” ни билдүргән.

Хәттә, йеқинқи вәқәләр хитай һөкүмитиниң 2019-йилдики башлиқлар йиғининиң ахирида баян қилинған аталмиш “хәлқара қанунға һөрмәт қилиш, б д т ниң ядроси вә хәлқара мунасивәтни башқуруш қаидиси қолланмиси болған б д т ни ядро қилған хәлқара қаидигә һөрмәт қилиш” вәдисиниң қанчилик қуруқ гәп икәнликини көрситип бәргәнликини билдүргән.

Хәтниң ахирида ярвопа иттипақиниң хитай билән болған кишилик һоқуқ диалогини тохтитип, аммивий тәшкилатлатлар билән болған қурулма характерлик диалогни алға сүрүш, хәлқаралиқ мустәқил тәкшүрүш елип берип, уйғур вә башқа түркий милләтләргә қаритилған вәһшилик вә инсанийәткә қарши җинайәтни тәкшүрүш, бир даимлиқ назарәт миханизими қуруп, хитайниң кишилик һоқуқ дәпсәндичиликини б д т кишилик һоқуқ кеңишигә доклат қилиш, б д т кишилик һоқуқ алий комиссариниң уйғурлар вәзийити һәққидики доклатини йәнә кечиктүрмәй елан қилишқа чақириш, уйғур, тибәт вә хоңкоңдики бастурушта җавапкарлиқи бар хитай әмәлдарлириға қарита нишанлиқ имбарго қоюш қатарлиқ тәләпләрни оттуриға қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.