“Yawropa ittipaqi-xitay kishilik hoquq diyalogi” da Uyghur mesilisining küntertipte bolidighanliqi bildürüldi
2024.06.10
Yawropa ittipaqi bilen xitay kishilik hoquq diyalogi 16-iyun küni xitayning chungching shehiride ötküzülidighan bolup, “Shinjang mesilisi” ikki terep diyalogidiki nuqtiliq muzakire témilirining biri bolidiken. Xewerlerde, yawropa ittipaqi söhbet ömikige uning asiya ishlirigha mes'ul diplomati pola pampaloning yétekchilik qilidighanliqi, söhbet ömikining xitaydiki kishilik hoquq mesilisige da'ir nurghun endishilirini, jümlidin küntertiptiki qiziq nuqtilardin bolghan tibet, Uyghur diyari we xongkong mesililirini otturigha qoyidighanliqi qeyt qilinmaqta. Yawropa ittipaqi tashqi ishlar komitéti élan qilghan bayanatta “Xitay hökümiti xelq'araning Uyghur diyarida terepsiz we musteqil tekshürüsh élip bérishigha yol qoyushi kérek” dégen mezmun yene bir qétim telep qilin'ghan.
Bayanatta “Yawropa ittipaqi musteqil xelq'ara mutexessisler, chet'ellik zhurnalistlar we diplomatlarning tibet, shinjang we xitayning bashqa jaylirida heqiqiy rewishte cheklimisiz hem nazaretsiz tekshürüshte bolushigha yol qoyulushini dawamliq telep qilidu” déyilgen. Yawropa ittipaqi 2023-yili xitay bilen biryussélda ötküzgen kishilik hoquq diyalogidin kéyin bayanat élan qilip, xitayni b d t kishilik hoquq aliy komissari élan qilghan “Shinjang doklati” diki tewsiyelerni ijra qilishqa chaqirghan.
Yawropa ittipaqining bayanatidin melum bolushiche, xitay 16-iyun chungchingda ötküzülidighan söhbet esnasida yawropa söhbet ömikining tibette ziyarette bolushigha yol qoyghan. Xewerlerde qeyt qilinishiche, yawropa ittipaqi tibetlerning insan heqlirini depsende qilish mesiliside xitayni eyiblewatqanda ularning bu rayonni ziyaret qilishigha yol qoyulushi az uchraydighan ehwal iken. Yawropa ittipaqi 2023-yili kishilik hoquq küni munasiwiti bilen élan qilghan bayanatida, xitayning tibettiki “Mejburiy yataqliq mektep we DNA ewrishkisini yighish” qa oxshash heriketliri “Kishilik hoquq weziyitining éghir ehwalini namayan qilidighanliqi” bildürülgen idi.