Yawropa ittipaqi xitayning kiyim-kéchek saheside Uyghur mejburiy emgikini qollan'ghanliqini eyiblidi

Yawropa ittipaqi parlamént ezalirining hawalisi bilen élip bérilghan eng yéngi tetqiqatta bayqilishiche, yawropa ittipaqi teweside sétiliwatqan kiyim-kécheklerdin az dégende 39 dangliq markining “Xitayning dölet belgiligen emgek küchini yötkesh pirogrammisigha qatnishishqa mejburlan'ghan Uyghurlarning emgek küchini ishlitish” bedilige ishlepchiqirilghanliq xewpi mewjut iken.

2023-Yili 12-ayning 6-küni firansiyening “Lé mondé” Le Monde) ) gézitide bérilgen mexsus doklatta mundaq déyilgen: “Xitayda Uyghurlarning mejburiy emgikini ishlitish dawamlashmaqta. Buning ichide yawropadiki dangliq markilargha kiyim-kéchek ishleydighan xitay shirketlirimu bar. Zara (Zara) , nékist (Next) , pirada (Prada) qatarliq kiyim-kéchek shirketliri az dégende Uyghur mejburiy emgikige chétilghan xitay shirketliridin töti bilen hemkarlashqan. ”

Yawropa ittipaqidiki bir qisim sotsiyal démokratik partiyelerdin bolghan parlamént ezaliri, en'gliye shéflid hallam uniwérsitéti (Sheffield Hallam University) tetqiqat guruppisi, Uyghur démokratiye we kishilik hoquq merkizi we Uyghur kishilik hoquq közetküchisi qatarliq tetqiqat merkezlirining doklatini neqil keltürüp, mundaq dégen: “Uyghur mejburiy emgiki bilen chétishliq zor miqdardiki kiyim-kéchekler héchqandaq cheklimige uchrimay yawropa ittipaqigha yötkiliwatidu. Bu yawropa ittipaqining siyasiti, istémalchilarni Uyghur mejburiy emgiki bilen bulghan'ghan mehsulatlarni sétiwélishtin tosmaydighanliqini körsitip béridu. ”

Bu doklat yawropa ittipaqining pirézidéntliri ursula won dér léyén we charléz mishél béyjinggha bérip, xitay pirézidénti shi jinping bilen yawropa-xitay bashliqlar yighinigha qatnishiwatqanda élan qilin'ghan. Ularning uchrishishi asasliqi soda mesilisige merkezleshken bolsimu, emma yawropa ittipaqining emeldari uchrishishtin ilgiri xitaydiki kishilik hoquq mesilisinimu otturigha qoyidighanliqini éytqan idi.