Явропа парламенти хитайниң уйғурларға қиливатқан зулумини “инсанийәткә қарши җинайәт вә еғир ирқий қирғинчилиқ хәвпи” дәп қобул қилди

Мухбиримиз ирадә
2022.06.09
Share on WhatsApp
Share on WhatsApp

9-Июн күни, явропа парламенти хитай һөкүмитиниң уйғурларға қаритиватқан зулумини “инсанийәткә қарши җинайәт вә еғир ирқий қирғинчилиқ хәвпи” дәп бекиткән. Мәзкур қарар явропа парламентида наһайити зор көпчилик авазниң қоллиши билән мақуллуқтин өткән болуп, уйғурлар үчүн тарихий вәқәләрниң бири болуп һесаблинидикән.

Дуня уйғур қурултийи бу һәқтики баянатида явропа парламентиниң қарарини һазирғичә явропа парламентида уйғурлар мәсилисидә қобул қилинған әң кәскин вә әң күчлүк қарарларниң бири, дәп баһалиған. Дуня уйғур қурултийи баянида мундақ дегән:

“дуня уйғур қурултийи (WUC) бүгүнки явропа парламентида хитай һөкүмитиниң шәрқий түркистандики уйғур хәлқигә қаритиватқан системилиқ зулуминиң инсанийәткә қарши туруш җинайити вә еғир ирқий қирғинчилиқ хәвпи икәнликини етирап қилидиған қарарниң мутләқ көп аваз билән мақулланғанлиқини қарши алиду. явропа иттипақи вә униңға әза дөләтләр б д т ирқий қирғинчилиқ әһдинамисигә асасән барлиқ зөрүр тәдбирләрни қоллинип, вәһшийликни түгитишкә чақирилған бу қарар уйғур хәлқигә адаләт елип келишкә чақирилған тарихи мураҗиәтнамә болуп һесаблиниду”.

Мәлум болушичә, хитайниң уйғурларға қиливатқан зулуми “инсанийәткә қарши җинайәт вә еғир ирқий қирғинчилиқ хәвпи” дәп қобул қилинған бу қарарда явропа иттипақи вә униңға әза дөләтләр б д т ниң “ирқий қирғинчилиқ әһдинамиси” дики мәҗбурийәтлирини ада қилиш, һәм шундақла хитайниң бу җинайәттә рол ойниған чен чүәнго вә җав кеҗи қатарлиқ әмәлдарлирини җазалаш қатарлиқ маддилар орун алған.

Дуня уйғур қурултийи рәиси долқун әйса баянатида йеқинда ашкариланған “шинҗаң сақчи һөҗҗәтлири” ниң явропа парламентиниң уйғур елидики вәзийәтниң тәхирсизлики вә үнүмлүк һәрикәтниң зөрүрлүкини һес қилиши үчүн интайин муһим ойғиниш чақириқи болғанлиқини муәййәнләштүргән вә: “явропа иттипақи вә униңға әза дөләтләр әмди қарардики бу чақириқларға әмәл қилиши вә пүтүн күчи билән һөкүмәтләр вә тәшкилатлар билән һәмкарлишип, уйғурларға қаритиливатқан ирқий қирғинчилиқни ахирлаштуруши керәк” дегән.

Дуня уйғур қурултийи мәзкур баянатида қарарниң қобул қилинишида күч чиқарған барлиқ парламент әзалириға рәһмәт ейтип, уларниң уйғурларниң кишилик һоқуқи вә әркинликини қоғдаш ирадисигә апирин оқуған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт