Явропа парламентиниң уйғур қирғинчилиқи һәққидики қарари хитайни бәкла чичаңшитти

Мухбиримиз әзиз
2022.06.10
Share on WhatsApp
Share on WhatsApp

9-Июн күни явропа парламенти мутләқ көп авазниң қошулуши билән хитай һөкүмитиниң уйғур дияридики зулум вә бастурушлирини “ирқий қирғинчилиқ” дәп қарар алғаниди. Хитай һөкүмити буниңға охшимиған йоллар арқилиқ наразилиқ билдүрүп, өзлириниң бу қарарға қәтий қарши туридиғанлиқини билдүрди.

“хитай хәвәр тори” ниң 10-июндики хәвиридә ейтилишичә, хитай һөкүмитиниң явропа иттипақидики вәкилләр өмики шу күни өткүзүлгән мухбирларни күтүвелиш йиғинида бу һәқтики соалларға җаваб берип “явропа парламентиниң арилашмайдиған иши қалмиди. Улар һазир бизгә зәһәрхәндилик билән һуҗум қилип шинҗаңда қирғинчилиқ болуватиду, дәп җар селиватиду. Бу һөкүмитимизниң шинҗаңни идарә қилиш ишлириға арилашқанлиқ, шуниңдәк хәлқара қанунларғиму хилап қилмиш” дегән.

Хитай вәкиллири бу һәқтә йәнә бир қетим кона муқамни тәкрарлап “өткән 70 йилда шинҗаңдики сиясий, иқтисадий вә мәдәнийәт саһәсидә тарихта мисли көрүлмигән гүлләп яшнаш барлиққа кәлди. Әмма ғәрбтики дүшмән күчләр буни көрүшни халимайватиду” дегән. Шундақла уйғур дияридики мәсилиниң террорлуқ вә ашқунлуққа қарши туруш күриши икәнликини, “ирқий қирғинчилиқ” һәққидики һәрқандақ һөкүмниң пут тирәп туралмайдиғанлиқини, уйғур нопусиниң 1950-йиллардики үч йерим милйондин көпийип һазир 11 милйондин ашқанлиқини тәкитлигән. Хитай ташқи ишлар министирлиқи вә башқа һөкүмәт тармақлириму мушу хилдики пикирләрни қилған.

Хитай һөкүмитиниң уйғур дияридики қирғинчилиққа даир тағдәк испатлар алдидиму йәнила буни изчил инкар қилиши һәққидә сөз болғанда “коммунизм қурбанлири хатирә фонди” ниң тәтқиқатчиси доктур адриян зенз “мәйли хитай һөкүмити қандақ шәкилдә инкарчилиқ мәйданини ипадилишидин қәтийнәзәр әмди улар дуняни алдап кетәлмәйду. Чүнки һазир мәлум болған дәлил-испатлар қуруқ гәпләр билән ағдурулуп кәтмәйду” дәйду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт