Явропа парламентидики “явропа – хитай достлуқ гурупписи” тохтитип қоюлған

Мухбиримиз ирадә
2021.01.28
Share on WhatsApp
Share on WhatsApp

Явропа парламентидики “явропа – хитай достлуқ гурупписи” тохтитип қоюлған. “политко” гезитиниң хәвәр қилишичә, мәзкур достлуқ гурупписиниң хитай һөкүмитиниң ташқи ишлар аппаратлириға бәк йеқинлиқи парламент әзалири арисида әндишә қозғиған икән.

Бу һәқтики әндишиләр өткән йили 11-айдин тартип көп қетим тилға елинған вә политко қатарлиқ мәтбуатларда хәвәр қилинған икән.

25-январ күни явропа парламентиниң чәтәл һөкүмәтлириниң тәсири көрситиш һәрикәтлирини көзитидиған алаһидә комитетида бу мәсилә һәққидә испат аңлаш йиғини өткүзүлгән. Бу йиғинда мәзкур гуруппа паалийәтлириниң 12-айдин башлап рәсмий тохтитилғанлиқи билдүрүлгән.

Парламент әзалири йиғинда мәзкур достлуқ гурупписиниң башлиқи, чех парламент әзаси заһрадилниң алдинқи айда мақулланған явропа-хитай мәбләғ селиш универсал келишими һәққидики җиддий сөһбәтләргә қатнашқан сода һәйитиниң муавин рәиси болуштәк муһим орунға игә болушиниң диққәт қозғайдиғанлиқини билдүргән. Униңдин сирт йәнә, мәзкур гуруппиниң баш катипи гәй лин, хитай пуқраси вә шундақла зәһрадилниң ярдәмчиси болуп, у өткән он йерим йил бойичә явропа иттипақи парламент әзалирини он нәччә қетим хитайға саяһәткә тәшкилләшкә мәсул болған болуп, бу саяһәтләр бейҗиңниң юмшақ күч аппаратлириға четилидикән.

Чех парламент әзаси зәһрадил йиғинда мәзкур гуруппа паалийәтлириниң 12-айдин башлап рәсмий тохтитилғанлиқини дәлиллигән. У өзиниң хитай тәрәпни пайдилиқ сода учуриға еришиш имтиязиға ериштүргәнлики вә достлуқ гурупписиниң хитайниң тәшвиқат қорали сүпитидә хизмәт қилғанлиқи һәққидики қарашларни рәт қилған. Бирақ у мәзкур достлуқ гурупписи уюштурған паалийәтләрниң чиқимини хитай һөкүмити үстигә алғанлиқини рәт қилалмиған.

Мәлум болушичә, шу күнки испат аңлаш йиғинида чех ақиллар амбири “синопсис институти” вә фирансийә ақиллар амбири “монтайин институти” дики тәтқиқатчилар хитай тәсири һәққидә сөз қилғанда явропа-хитай достлуқ гурупписини хитай дөлитиниң явропа сияситигә арилишишқа урунушниң бир мисали дәп баһалиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт