Yawropa ittipaqi xitayni agahlandurdi

Yawropa ittipaqining ijra'at orgini-yawropa komissiyisi xitaygha diplomatik agahlandurush bérip, her qandaq döletning jenubiy déngizda erkin qatnishi kéreklikini bildürdi. Yawropa komissiyisi xitayning ismini ashkara tilgha almighan bolsimu, emma u jenubiy déngizning “Mewjut halitini özgertip, weziyetni jiddiyleshtürüshke qarshi turidighanliqi” ni bildürgen.

Bu yawropa komissiyisining jenubiy déngiz mesiliside xitaygha tunji qétim diplomatik agahlandurush bérishi. U bu diplomatik agahlandurushni charshenbe küni élan qilghan “Yawropa ittipaqining xitaygha qarita yéngi istratégiye nizami” namliq höjjitide otturigha qoydi.

Höjjette mundaq déyilgen: “Yawropa ittipaqi jenubiy déngiz we uning hawa tewelikide erkin qatnash we uchushning qoghdilishini ümid qilidu.” yawropa komissiyisining mezkur höjjitide yawropa ittipaqining kelgüsi 5 yilliq xitay siyasiti otturigha qoyulghan. Biraq mezkur höjjetni yawropa ittipaqigha eza 28 dölet maqullishi kérek.

Yawropa ittipaqi ilgiri jenubiy déngiz mesiliside bitereplikni saqlaydighanliqini tekitlep kelgen. Emma amérika yawropa ittipaqini xitayning jenubiy déngizdiki igilik hoquq telipige qarshi turushqa ündep kéliwatqan idi.

Xitay jenubiy déngizning asasen barliq qismida igilik hoquqi barliqini élan qilip, etraptiki wiyétnam, filippin, hindonéziye qatarliq döletlerning naraziliqini qozghighan.