Явропа иттипақи рәиси хитайға содида әмди “саддилиқ” қилмайдиғанлиқини, хитайниң “характери” ни өзгәртиши керәкликини ейтқан

Явропа иттипақи рәиси чарлис мишел, 11-өктәбир франсийә агентлиқиниң зияритини қобул қилип, явропа иттипақиниң хитай билән болған содида әмди “саддилиқ” қилмайдиғанлиқини, хитайниң “характерини өзгәртиш” арқилиқ, явропа билән үзлүксиз күчийиватқан таможна беҗи ихтилапини һәл қилиши керәкликини ейтқан. Мәлум болушичә, чарлис мишел 11-өктәбир хитай баш министири ли чяң билән лаос пайтәхти вйентянда көрүшкәндин кейин, фирансийә агентлиқиниң зияритини қобул қилған. Шәрқи-җәнубий асия дөләтлириниң башлиқлар йиғиниға қатнашқан чарлис мишел билән ли чяң, йиғин әснасида көрүшкән болуп, бу учришиш икки тәрәпниң таможна беҗи уруши кәскинләшкән, явропа иттипақи бу һәптә хитай токлуқ аптомобиллириға 35 пирсәнт баҗ қойидиғанлиқини елан қилған, хитай болса явропа коняклириға баҗ қойидиғанлиқини җакарлиған бир мәзгилгә тоғра кәлгән.

“фирансийә агентлиқи” ниң қәйт қилишичә, чарлис мишел өзиниң ли чяң билән көрүшкәндин кейин, икки тәрәпниң кәлгүси бир қанчә күн яки бир қанчә һәптә ичидә келишим һасил қилишини үмид қилсиму, әмма буниң “интайин мүшкүл” икәнликини ейтқан. Чарлис мишел мундақ дегән: “биз хитайниң өз характерини өзгәртишини, иқтисадий мунасивәтлиримизни техиму мувапиқ, техиму адил риқабәт вә тәң баравәрлик асасида қайта тәңшишимиз керәкликини чүшинип йетишини күтимиз”.

“фирансийә агентлиқи” ниң билдүрүшичә, чарлис мишел икки тәрәпниң содидики ихтилапни һәл қилиш чариси тепишиға қисмән үмид бағлайдиғанлиқини қәйт қилған болсиму, бирақ у йәнә явропа иттипақи әмди (хитайниң) експорт мәһсулатлириға һөкүмәт қошумчә ярдәм пули бериш мәсилисидә “саддилиқ” қилмайдиғанлиқини ейтқан. У мундақ дегән: “бизниң күчлүк һәм қанунлуқ мәнпәәтимиз бар. Хәлқимизни, вәтәндашлиримизни қоғдаш явропа иттипақиниң мәсулийитидур”. Мәлум болушичә, нөвәттә явропа иттипақи хитайниң күнтахта вә шамал чақпәлики мәһсулатлириға қошумчә ярдәм бериши үстидинму тәкшүрүш елип бармақта икән.