Yawropa ittipaqi xitaygha Uyghur mesilisi tüpeylidin jaza yürgüzgen

Muxbirimiz jewlan
2021-03-22
Share

Roytérs agéntliqining 22-mart xewer qilishiche, yawropa ittipaqi xitayning Uyghurlargha yürgüzgen kishilik hoquq depsendichilikige qarshi heriket qollinip, 4 neper xitay emeldarigha jaza yürgüzgen, buning ichide birsi xitay dölet xewpsizliki idarisining yuqiri derijilik bashliqi iken. Bu yawropa ittipaqining 1989-yildin buyan tunji qétim xitayni jazalishi hésablinidiken.

Bu 4 emeldar Uyghurlarni keng-kölemde lagérlargha solashning aktip ijrachisi — Uyghur aptonom rayonluq j x idarisining bashliqi chén minggo, Uyghur aptonom rayonluq partkomning da'imiy hey'et ezasi, siyasiy-qanun komitétining sékritari wang mingshen, Uyghur aptonom rayonluq partkomning mu'awin sékritari, bingtu'en partkomining sékritari wang jünjéng, Uyghur aptonom rayonluq partkomning sabiq mu'awin sékritari we siyasiy-qanun komitétining sékritari ju xeylun qatarliqlar bolup, ular Uyghur rayonida élip barghan insaniyetke qarshi jinayetliri bilen jazalinip, yawropadiki mal-mülki tonglitilidiken we yawropagha sayahet qilishi cheklinidiken.

Xewerde bildürülüshiche, gerche bu jazalar simwol xaraktérlik bolsimu, yawropa ittipaqining xitaygha qattiq qol pozitsiye tutidighanliqini ipadileydiken. Yawropa ittipaqi uzundin béri xitayni dost, sodida hemkarlashquchi dep qarap kelgen bolup, emdilikte xitayni kishilik hoquq we erkinlikni depsende qilghuchi dölet dep qarashqa bashlighan.

Yawropa ittipaqidiki 29 döletning hemmisi bu jaza tedbirige qoshulghan bolup, peqet wén'giriye tashqiy ishlar ministirila bu tedbirni "Ziyanliq we ehmiyetsiz" dep qarighan. Bular yawropa ittipaqi döletlirining xitayning iqtisadiy tehditige taqabil turup, öz menpe'etlirini qoghdash jehette téxi toluq birlikke kélip bolalmighanliqini körsitip béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet