Yawropa ittipaqi bilen türkiye köchmenler mesiliside kélishim hasil qildi

Yawropani nishanlap köchüwatqan süriye musapirlirini türkiye tewelikide toxtitish meqsitide yawropa ittipaqining rehberliri 29 - noyabir küni türkiye hökümiti bilen öz - ara kélishim hasil qildi.

Roytiris agéntliqining xewer qilishiche, mezkur kélishimning mezmunigha bina'en, yawropa ittipaqi bu yil turkiyeni üch milyard yawro xirajet bilen teminleydu. Türkiye mushu pul arqiliq türkiye tewelikide turuwatqan ikki milyondin artuq süriyelik musapirning turmush shara'itini yaxshilaydu, jümlidin süriyelik musapirlar üchün erebche mekteplerni échish we bashqa tedbirler arqiliq bu musapirlarni yawropagha barmasliqqa righbetlendüridu.

Yawropa ittipaqi bilen türkiye otturisida 2013 - yili imzalan'ghan öz - ara wiza kechürüm qilish kélishimide “Eger türkiye hökümiti türkiyedin yawropagha kelgen, emma panahliq iltimas qilishqa sherti toshmaydighan türkiye puqralirini toluq qayturup ketse, türkiye puqraliri yawropaning shen'gen wiza rayonigha wiza iltimas qilmastin bérishqa bolidu” dep belgilen'gen. Yekshenbe künidiki kélishimde mushu mesile qaytidin tilgha élinip, eger türkiye yawropadiki panahliq shertige chüshmeydighan türklerni qayturup kétish shertini ada qilsa türkiye puqraliri wizisiz sayahetni 2016 - yili öktebirde bashlisa bolidu, déyilgen.