Xitayning yaxshichaq mu'amilisi amérika üchün bir mesile iken

Dunyada ikkinchi chong iqtisadiy küch bolghan xitay aldinqi yillarda xelq'arada “Chilböre diplomatiyesi” yürgüzgen bolsimu, bügünki künde ichkiy-tashqiy kirzislargha boghulup, iqtisadi chöküshke bashlighandin kéyin, amérika qatarliq gherb ellirige yaxshichaq bolushqa bashlighan.

24-Yanwar küni “Blombérg tori” da élan qilin'ghan bir maqalide körsitilishiche, xitayning “Chilböre diplomatiyesi” amérikaning xitaygha qarshi xelq'ara ittipaq qurushini tézletken bolup, shi jinping buni emdi hés qilip, ilgiriki pozitsiyesini özgertishke bashlighan. Biraq amérika bu qétim xitayning “Xush chiray mu'amilisi” ge yene aldansa, özining diplomatiyediki ajizliqini ashkarilap qoyidiken.

Maqalide éytilishiche, 2020-yil kowid yuqumi yamrighandin kéyin xitay özining qoshnisi bolghan hindistan, yaponiye, teywen, wéytnam qatarliq döletlerge herbiy tehdit salghan, xitayning “Chilböre diplomatiyesi” dunyadiki her qaysi döletlerni ghezeblendürgen. Xitay yene ukra'inagha hujum qilghan rusiye terepte turup, özining qebihlikini téximu ashkarilighan. Amérika buning aldidila yaponiye, hindistan, awstraliye bilen “Töt dölet ittipaqi” qurghan bolup, arqidin natogha eza döletler bilen “7 Dölet ittipaqi” mu xitaygha qarshi birlik sep tüzüshke bashlighan. Buni körgen shi jinping birdinla eqilliq boluwélip, kowid qamal siyasitini tézdin bikar qilip, xelq'ara bilen yariship qélish koyigha chüshken.

2023-Yil amérika duch kélidighan eng chong diplomatik mesile xitayning yaxshichaq pozitsiyesige qandaq inkas qayturush mesilisi iken. Amérikaning yawropadiki ittipaqdashliri yenila xitay bilen munasiwetni saqlap qélish terepdarliri bolup, amérika eger bu döletlerge xitaydek menpe'et bérelmise, ularning öz menpe'etini qoghdash üchün xitay bilen dawamliq hemkarlishishi mumkin iken we bu mesile amérikani qiyin ehwalda qoyidiken.