Америка "йәһудийлар аммиви ишлар кеңиши" уйғур ирқий қирғинчилиқини әйибләшни қарар қилди

Мухбиримиз ирадә
2021-04-29
Share

Америкадики йәһудий гуруппилириниң асаслиқ сиясәт мәркизи болған "йәһудийлар аммиви ишлар кеңиши" хитай һөкүмити уйғурларға йүргүзүватқан "ирқий қирғинчилиқ" ни әйибләшни қарар қилған.

"йәһудийлар аммиви ишлар кеңиши" ниң қарарлири адәттә башқа нурғун йәһудий тәшкилатлириниң өз-ара музакириси нәтиҗисидә чиқирилидиған һәмдә америкадики йәһудийларниң паалийәт-һәрикәтлириниң йөнилишини бәлгиләйдиған болғачқа, уларниң қарарлири интайин муһим әһмийәткә игә икән.

"йерусалим почтиси" гезитиниң хәвәр қилишичә, мәзкур кеңәш йеқинда барлиқ дөләтлик вә йәрлик йәһудий тәшкилатлири бирликтә чақирған икки күнлүк қурултайдин кейин бу қарарни елан қилған. Қарарнамида мундақ дейилгән: "йәһудийлар хитай компартийәсини уйғурларға қаратқан ирқий қирғинчилиқ вә бастурушлирини ахирлаштурушқа, шундақла өз чеграси ичидә яшайдиған башқа аз санлиқ милләтләр вә диний аз санлиқларни езишни тохтитишқа чақириду."

Хәвәрдә ейтилишичә, мәзкур қарар йәһудийларниң уйғурларни қоллаш һәрикәтлириниң күчийишидә өзини намайән қилидиған болуп, қарар бойичә йәһудийлар аммиви ишлар кеңиши өз күнлүки астидики барлиқ тәшкилатларни уйғур ирқий қирғинчилиқиға қарши сөз қилишқа вә башқа җәмийәт вә гуруппилар билән һәмкарлишип "уйғурларға қаритилған вәһшийликниң алдини елиш үчүн асасий қатлам һәрикити бәрпа қилишқа" чақиридикән.

Мәзкур кеңәш америкадики әң күчлүк лобичи гуруппиларниң бири болуш сүпити билән америка дөләт мәҗлиси вә һөкүмитиниң сиясәт бәлгилишигиму бәлгилик тәсир көрситип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт