Йәһудий өлималири америка дөләт мәҗлисини уйғурлар мәсилисидә һәрикәт қоллинишқа чақирған

Мухбиримиз җәвлан
2021-03-03
Share

"ерусалим почтиси" ниң 3-март хәвәр қилишичә, һәр хил мәзһәптики рабилар (йәһудий өлималири) америка дөләт мәҗлисини уйғурлар мәсилисидә һәрикәт қоллинишқа чақирған. 16 Раби имза қойған бирләшмә мәктуб алдинқи һәптә авам палата әзаси тед люға сунулған. Тед лю (Ted Lieu) лос анжелис районидики хәлқ сайлап чиққан вәкил болуп, бу районда йәһудий җамаити көп олтурақлашқан икән.

Рабилар сунған бу мәктубта уйғур районидики лагерларни тақаш вә уйғурларни мәҗбурий ишлитип ишләпчиқарған хитай маллирини америкаға киргүзмәслик қатарлиқ мәзмунлар бар икән. Мәктубта мундақ дейилгән: "силәрниң уйғурлар тоғрулуқ түзүлгән қанунни қоллишиңлар узун муддәт зулумға учрап кәлгән бу хәлқниң техиму еғир зораванлиққа учришиниң алдини елишта һәл қилғуч рол ойнайду". Рабилар йәнә тед люни "йәһудийлар дунясини көзитиш тәшкилати" билән һәмкарлиқ орнитишқа чақирған болуп, мәзкур тәшкилат ирқий қирғинчилиққа қарши туруш һәрикитидә актип рол ойнап кәлгән һәмдә уйғурлар үчүн паалийәт қилған икән.

Хәвәрдә көрситилишчә, йәһудий паалийәтчилириниң, болупму әнгилийәдики йәһудийларниң уйғурлар үчүн аваз чиқириши, алдинқи әсирдики ирқий қирғинчилиқни баштин кәчүргән йәһудий шаһитларниң уйғурлар һәққидә сөзлигән сөзлири дуняниң һәр қайси җайлиридики йәһудий җамаити арисида диққәт қозғиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт