Xitayning yéngi partkom sékrétari yéngi yilni Uyghur élining ishlepchiqirish sahesini tekshürtüshtin bashlighan

Xitayning ötken yili 24-dékabir tuyuqsiz gu'angdung ‍ölkisidin Uyghur élige yötkep kélinip, Uyghur aptonom rayonluq partkomning sékrétarliqigha teyinlen'gen ma shingruy, yéngi yilliq xizmitini Uyghur élidiki halqiliq ishlepchiqirish saheliridin tekshürüshtin bashlighan. U tekshürüshte ishlepchiqirish orunlirining mulazimetni serxillashturushi, süpetni yughuri kötürüshi we téxnika yéngilashni tézlitishini telep qilghan.

Ma shingrüy bir hepte awwal Uyghur élige yötkilip kélip rayondiki xitay kadirlirigha achqan tunji yighinida we arqidinla ürümchi iqtisadiy-téxnika tereqqiyat rayonini közdin kechürgende, muqimliq omumi nishan bolsimu, biraq xizmetning muhim nuqtisini iqtisadiy tereqqiyatqa qaritidighanliqini éytqan.

U, teminat zenjirini zamaniwilashturush, xelq'ara soda we téxnika yéngilashni algha süridighanliqini bildürgen. Biraq mejburiy emgek we lagérlar mesililirini tilgha almighan. Közetküchiler, uning sözi xitayning Uyghur irqiy qirghinchiliq siyasitide tüp özgirish bolmaydighanliqini körsitidu, dep qarighanidi. “Shinjang” gézitining ashkarilishiche, ma shingrüy yéngi yil küni ‍ürümchi yuqiri sür'etlik tömüryol békiti, maytagh néfit-ximiye shirkiti, shinjang tyenli néfit-ximiye pay cheklik shirkiti, Uyghur aptonom rayonluq jiddiy ishlargha taqabil turush nazariti qatarliq orunlarni közdin kechürgen.

U ‍ürümchi yuqiri sür'etlik tömüryol békitini közdin kechürgende “Adem we maddiy eshyalarning bixeter, tertiplik we rawan yötkilishige kapaletlik qilish” ni telep qilghan. U tyenli néfit-ximiye shirkitide qilghan sözide, “Achquchluq téxnika tetqiqatini tézlitish, yuqiri qimmetke ige yéngi matériyal we yéngi mehsulatlarni tereqqiy qildurush, reqemlik özgertish, eqliy iqtidarliq özgertish we yuqiri sewiyelik tereqqiyatni tézlitish” ni tekitligen.