Йеңи зеландийәдики уйғур бирләшмиси хитай консолханисиниң алдида намайиш қилған

Мухбиримиз җәвлан
2021-04-22
Share

4-Айниң 21-күни йеңи зеландийәниң етироа уйғур бирләшмиси билән хәлқ вә тинчлиқ иттипақи әзалири бирликтә хитайниң етироа консолханиси алдида намайиш қилип, хитайниң уйғурларға йүргүзүп келиватқан зиянкәшликлиригә қарши наразилиқ билдүргән.

Етироа уйғур бирләшмисиниң баянатчиси елияна мундақ дегән: "биз хитай консолханисиниң алдиға йиғилип, хитай компартийәсиниң қолида азаб чекиватқан уйғурлардин әндишә қиливатқанлиқимизни билдүрдуқ. Биз өзимиздики әркинликтин пайдилинип, хитай бесивалған шу райондики хәлқниң һоқуқини қоғдашни давамлаштуримиз".

Мәзкур бирләшмә елан қилған ахбараттин мәлум болғинидәк, бу бирләшминиң тәркибидә уйғурлар үчүн халис күч чиқириватқан йеңи зеландийәлик яшлар бар болуп, уларниң уйғурлар учраватқан зулумға болған тонуши наһайити чоңқур, хитайниң җинайитигә қарши туруш ирадиси күчлүк икән.

Уйғур бирләшмисидин сам венсент мундақ дегән: "әһвал наһайити җиддий, вақитниң өтүшигә әгишип биз техиму көп уйғурларниң лагерда өлүп кетишидин әнсирәймиз. Биз шуни билимизки, бу һәргиз хитайниң ичкий иши әмәс, бәлки хәлқаралиқ кишилик һоқуқ мәсилиси. Наһайити ениқки, хитайниң бу сиясәтлири уйғурларни йоқитишнила мәқсәт қилған".

Йеқинқи хәвәрләрдин мәлум болушичә, йеңи зеландийә дәриҗидин ташқири фонди кишилик һоқуқ дәпсәндичилики җинайитигә четишлиқи түпәйлидин американиң қара тизимликигә киргән икки хитай ширкитигә 500 миң доллар мәбләғ салған.

Елиянаниң билдүрүшичә, йеңи зеландийә карханилири хитай билән сода қилип, хитайниң уйғурларға йүргүзүватқан ирқий қирғинчилиқ җинайитигә шерик болмаслиқи, һарам пайдини кишилик һоқуқниң үстигә қоювалмаслиқи керәк икән. Һөкүмәтни бу мәсилигә сәл қаримаслиққа, бәлки бу җинайәтни тохтитиш үчүн үнүмлүк тәдбирләрни елишқа чақириш керәк икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт