Xitay da'iriliri uchturpanning yamansudiki yer tewreshke a'it uchurlarni téximu qattiq kontrol qilmaqta

Washin'gtondin muxbirimiz erkin teyyarlidi
2024.01.29

23-Yanwar uchturpan nahiyeside yüz bergen 7.1 Bal yer tewreshke 6-7 kün bolghan bolsimu, lékin yer tewreshning konkrét ehwaligha da'ir tepsilatlar yenila qattiq kontrol qilinmaqta.

Uchturpandiki yer tewreshning buzghunchiliq kölimi we ziyan zexmetke a'it uchurlar intayin cheklik boluwatqan bir peytte, Uyghur aptonom rayonluq j x nazariti torda “Ösek söz” tarqitip bir terep qilin'ghan 6 tipik déloni élan qilip, torda yer tewreshke a'it uchur tarqatqanlarni qattiq agahlandurghan.

Nöwette, Uyghur rayondiki taratqulirida, xitay da'irilirining yer tewresh rayonida qutquzush élip bériwatqanliqi, xelqlerning chong tesirge uchrimighanliqi, puqralarning xatirjemlikke ériship, turmushining normallashqanliqigha xewerler keng tarqitilsimu, emma yer tewreshning heqiqiy ehwali, uchrighan ziyan, ölüm-yitim, yer tewresh rayonidiki xelqning yardemge bolghan éhtiyajigha da'ir uchurlarning kontrol qiliniwatqanliqi melum.

Da'irilerning 28-yanwar torda “Ösek söz” tarqitishqa da'ir 6 tipik déloni élan qilishimu, rayonda yer tewreshke a'it uchurlar qattiq kontrol qiliniwatqanliqining ipadisi, dep qaralmaqta. Xitay hökümiti hazirgha qeder merkizi yamansu yézisidiki 7.1 Bal yer tewreshte 12 mingdin artuq ademning köchürülgenliki, 3 ademning ölgenlikini qeyt qilsimu, emili ehwalning buningdin éghirliqi, yamansu yézisining éghir buzghunchiliqqa uchrighanliqi ilgiri sürülmekte.

“Shinjang xewerliri” torining uchuridin melum bolushiche, Uyghur aptonom rayonluq j x nazariti 28-yanwar élan qilghan torda “Ösek söz” tarqitishqa alaqidar 6 tipik déloning az dégen üchi yer tewreshke a'it uchurlarni tarqatqaniken. Xewerde, aqsu, chöchek qatarliq jaylardin bolghan bu kishilerning “Ösek söz tarqitip, jem'iyette yaman tesir peyda qilghanliqi” qeyt qilinmaqta. Xewerdin melum bolushiche, bu kishilerdin aqsuda olturushluq biri torda “Uchturpandiki yer tewresh seweblik öylerge dez ketti”, dep uchur tarqatqanliqi, yene biri “Bu kéche 6 baldin qattiq yer tewrishi mumkin” dégenliki üchün memuri jaza yaki terbiye bérish jazasigha tartilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.