Uchturpandiki qar-boran apitining xewerliri yer tewresh apitining uchurlirini bésip qoyghan

Washin'gtondin muxbirimiz jewlan teyyarlidi
2024.02.21

Xitayning “Tengritagh tori”, “Shinjang géziti” tori 19-féwral küni chiqarghan xewerdin melum bolushiche, Uyghur diyaridiki uchturpan nahiyesining köp qisim jayliri soghuq éqimning tesiride qar-boran we qum-boran apitige uchrighan.

Xewerde, hökümet orunlirining uchturpan yamansu yézisidiki adem we mal-charwilarni soghuqtin saqlash üchün jiddiy heriketke ötkenliki teshwiq qilin'ghan.

1-Ayning 23-küni tang seherde uchturpan nahiyeside 7.1 Bal yer tewrigendin kéyin, xitay hökümiti uchurlarni qattiq qamal qilghanidi. Xitay metbu'atliri, apet eng éghir bolghan uchturpan yamansu yézisida üch ademning ölgenliki, 5 ademning yarilan'ghanliqini xewer qilghan bolsimu, heqiqiy ehwal ta hazirghiche bilinmey kelmekte. Örülgen, weyran bolghan öyler, öysiz qalghan kishilerning qehritan qishta qandaq panahlan'ghanliqi heqqide héchqandaq uchur yoq.

Yéqinqi künlerde Uyghur rayonining shimalidiki soghuq hawa éqimining uchturpan nahiyesi qatarliq jenubtiki nahiye, wilayetlergimu tesir körsitiwatqanliqi melum. 2-Ayning 19-küni altayning köktoqay nahiyesidiki hawa témpératurisi nöldin töwen 52.3 Gradusqa yétip, 64 yildin buyanqi eng qattiq soghuq peyda bolghan. Buninggha egiship kelgen qar-boran apitide hetta qushlarmu tonglap ölgen. Xitay teshwiqat wasitiliride “Shimalda qar-shiwirghan, jenubta qum-boran apiti körüldi, emma ölüsh-yarilinish ehwali yoq” déyilgen bolsimu, apetning heqiqiy ehwali yenila namelum halette turmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.