Xitay da'irilirining bay nahiyeside yüz bergen yer tewreshke da'ir xewerlerni kontrol qilishi diqqet qozghidi

23-Mart küni Uyghur aptonom rayonining bay nahiyeside 5 bal yer tewrigen.

Xitayning “Junggo xewerliri” agéntliqining bu heqtiki xewiride bildürüshiche, yerlik da'iriler yer tewreshning ademsiz rayonda yüz bergenliki, tewresh merkizige yéqin yéza-kentlerde héchqandaq ölüm-yitim, öy örülüsh, mal-mülük ziyan'gha uchrash hadisilirining körülmigenlikini ilgiri sürgen. Lékin yer tewreshning konkrét ornigha da'ir héchqandaq uchur bermigen.

Bu qétimqi yer tewresh xitayning wuxen shehiride partlighan korona wirusi pütün xitay we dunyani qaplap, nurghun jaylar karantin'gha élin'ghan, Uyghur aptonom rayoni yuqumning toxtighanliqini élan qilghan bolsimu, lékin uning heqiqiy ehwaligha da'ir uchurlarni qattiq kontrol qilip, Uyghur “Éshincha emgek küchliri‚ ni keng-kölemlik zawut-karxanilarda ishleshke mejburiy teshkillewatqan mezgilde yüz bergen idi.

Nöwette xitay taratqulirining baydiki yer tewreshke da'ir xewerlerni kontrol qilishi diqqet qozghimaqta. Yer tewreshke da'ir xewer 23-mart küni xitayning “Junggo xewerliri” de nahayiti cheklik tilgha élindi, lékin qalghan xitay taratqulirida bek xewer qilinmidi.

Xitay yer tewreshni közitish idarisining torida élan qilin'ghan bu heqtiki uchurda qeyt qilinishiche, bu qétimqi yer tewreshning merkizi shimaliy mérdiyan 41.75 Gradus, sherqiy parallél 81.11 Gradus bolup, tewresh chongqurluqi 10 métir iken.