Amérika bilen gollandiye xitayni yérim ötküzgüch téxnikasidin chekleshte öz'ara kélishishi mumkin

Baydin hökümiti ötken yil 10-aydin bashlap xitaygha komputér öziki yasashta qollinilidighan bir qatar istratégiyelik téxnika we mehsulatlarning ékisport qilinishini chekligen. Shundaqla xitayning téxnika we herbiy tereqqiyatini astilitishni meqset qilghan bu tirishchanliqigha yene asasliq yérim ötküzgüch téxnikasigha ige döletlerdin yaponiye we gollandiyeningmu ishtirak qilishini qolgha keltürüsh üchün heriket qiliwatqan idi.

Roytérs agéntliqining ehwaldin xewerdar amérika emeldarlirining sözige asasen bergen xewirige qarighanda, amérika we gollandiyening munasiwetlik emeldarliri, 27-yanwar jüme küni washin'gtonda mushu mesile üstide muzakirige olturidiken. Eger ikki terep birlikke kélelise, jüme künila bir kélishim hasil bolushi mumkin iken.

Yérim ötküzgüch yasashta intayin muhim bolghan litografik üskünilerni ishlepchiqiridighan ASML Holding Shirkiti gollandiyede bolghachqa, uning hemkarliqini qolgha keltürüsh, xitayning herbiy tereqqiyatini istratégiyelik téxnika bilen teminleshni astilishta zor rol oynaydiken.

“Nyu-york waqti géziti”ning xewer qilishiche, yaponiye bash weziri fumi'o kishida yéqinda amérikada ziyarette bolghandimu xitaygha yérim ötküzgüch ékisportini cheklesh heqqide muzakire bolghan. Amérika we yaponiyening birleshme bayanatida bu heqte: “Yérim ötküzgüch qatarliq halqiliq we yéngidin gülliniwatqan téxnikalarni qoghdash we tereqqiy qildurushni öz ichige alghan iqtisadiy bixeterlik hemkarliqimizni chongqurlashturimiz” déyilgen idi.