Хитайниң уйғур елидики аталмиш “йешил енергийә” түри муһитни техиму еғир булғиған

Мухбиримиз ирадә
2021-12-30
Share

Хитайниң уйғур елида йолға қойған аталмиш “йешил енергийә” түриниң әмәлийәттә муһитни техиму еғир булғайдиғанлиқи ашкариланған.

Японийәниң “никкеий асия гезити” ниң хәвәр қилишичә, шаңхәй електр енергийәси ширкитиниң дөләт тәстиқлиған бу қурулуш түри әслидә көмүр канлиридин чиқириветилгән кокус мейи газини йиғип, уни газ вә пар турбиниси арқилиқ токқа айландуруш үчүн лайиһиләнгәникән.

Әмма сәйшәнбә күни кәчтә шаңхәй аксийә базириниң тор бетидә елан қилинған баянатта, бу ширкәтниң тазилаш системиси карға кәлмигәнликтин, тәркибидә зор миқдарда бирикмә фенол болған булғанған суниң намувапиқ һалда қоюп берилгәнлики елан қилинған. Баянатта “исми ашкариланмиған ташқи мутәхәссисләр гурупписи тазилаш системисиниң муһит өлчимигә тошмайдиғанлиқини йәкүнлигәнлики, нәтиҗидә уда зиян тартқан шаңхәй електр енергийәси ширкитиниң бу түрни тақашни қарар қилғанлиқи баян қилинғаникән.

“никкеий асия” гезити бу баянатқа асасән шаңхәй електр енергийә ширкитини зиярәт қилмақчи болған болсиму, бир җавабқа еришәлмигән.

Уйғур ели нөвәттә хитайни ток билән тәминләватқан әң муһим мәнбәләрниң бири, у һазирғичә хитайниң 16 өлкисидики 250 милйон адәмни ток билән тәминләп кәлмәктә.

Хитай һөкүмити хитай өлкилирини ток билән тәминләш миқдарини ашуруш үчүн, уйғур елида чоң боғаз-қумул ток йәткүзүш-өзгәртиш қурулуши, шәрқий җуңғар-җәнубий әнхуй ток йәткүзүш қурулуши вә шундақла “шинҗаңниң токини сиртқа йәткүзүш” қурулушиниң 3-линийәси һесаблинидиған қумулниң шимали-хубей җиңмен алаһидә юқири бесимлиқ турақлиқ ток йәткүзүш қурулушлирини йолға қойғаниди.

Көзәткүчиләрниң қаришичә, хитайниң ичкири өлкилирини пакиз енергийә билән тәминләш бәдилигә, уйғур елиниң муһити көмүр газида еғир дәриҗидә булғиниватқан бир шараитта, аталмиш йешил енергийә қурулушиниңму муһит булғиши уйғур ели муһитиниң қайси дәриҗидә бузғунчилиққа учраватқанлиқини намаян қилип беридикән.

Хәвәрдә ейтилишичә, бу аталмиш йешил енергийә қурулуши 2014-йили хитай дөләтлик тәрәққият вә ислаһат комитети, хитай иқтисадий пилан мәркизи вә шинҗаң ишләпчиқириш вә қурулуш биңтуәни тәрипидин тәстиқланғаникән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт