Xitayning Uyghur élidiki atalmish “Yéshil énérgiye” türi muhitni téximu éghir bulghighan

Muxbirimiz irade
2021.12.30

Xitayning Uyghur élida yolgha qoyghan atalmish “Yéshil énérgiye” türining emeliyette muhitni téximu éghir bulghaydighanliqi ashkarilan'ghan.

Yaponiyening “Nikké'iy asiya géziti” ning xewer qilishiche, shangxey éléktr énérgiyesi shirkitining dölet testiqlighan bu qurulush türi eslide kömür kanliridin chiqiriwétilgen kokus méyi gazini yighip, uni gaz we par turbinisi arqiliq tokqa aylandurush üchün layihilen'geniken.

Emma seyshenbe küni kechte shangxey aksiye bazirining tor bétide élan qilin'ghan bayanatta, bu shirketning tazilash sistémisi kargha kelmigenliktin, terkibide zor miqdarda birikme fénol bolghan bulghan'ghan suning namuwapiq halda qoyup bérilgenliki élan qilin'ghan. Bayanatta “Ismi ashkarilanmighan tashqi mutexessisler guruppisi tazilash sistémisining muhit ölchimige toshmaydighanliqini yekünligenliki, netijide uda ziyan tartqan shangxey éléktr énérgiyesi shirkitining bu türni taqashni qarar qilghanliqi bayan qilin'ghaniken.

“Nikké'iy asiya” géziti bu bayanatqa asasen shangxey éléktr énérgiye shirkitini ziyaret qilmaqchi bolghan bolsimu, bir jawabqa érishelmigen.

Uyghur éli nöwette xitayni tok bilen teminlewatqan eng muhim menbelerning biri, u hazirghiche xitayning 16 ölkisidiki 250 milyon ademni tok bilen teminlep kelmekte.

Xitay hökümiti xitay ölkilirini tok bilen teminlesh miqdarini ashurush üchün, Uyghur élida chong boghaz-qumul tok yetküzüsh-özgertish qurulushi, sherqiy jungghar-jenubiy enxuy tok yetküzüsh qurulushi we shundaqla “Shinjangning tokini sirtqa yetküzüsh” qurulushining 3-liniyesi hésablinidighan qumulning shimali-xubéy jingmén alahide yuqiri bésimliq turaqliq tok yetküzüsh qurulushlirini yolgha qoyghanidi.

Közetküchilerning qarishiche, xitayning ichkiri ölkilirini pakiz énérgiye bilen teminlesh bedilige, Uyghur élining muhiti kömür gazida éghir derijide bulghiniwatqan bir shara'itta, atalmish yéshil énérgiye qurulushiningmu muhit bulghishi Uyghur éli muhitining qaysi derijide buzghunchiliqqa uchrawatqanliqini namayan qilip béridiken.

Xewerde éytilishiche, bu atalmish yéshil énérgiye qurulushi 2014-yili xitay döletlik tereqqiyat we islahat komitéti, xitay iqtisadiy pilan merkizi we shinjang ishlepchiqirish we qurulush bingtu'eni teripidin testiqlan'ghaniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.