Xitaydiki zeherlik juwawa délosi heqqidiki sot metbu'atlarning diqqitini qozghidi

30-Iyul küni xébiy ölkilik ottura sot 2008-yili yüz bergen yaponiyege éksport qilin'ghan zeherlik juwawa délosidiki gumandar lu yöting üstidin sot achqan.

Bu sot heqqidiki xewerler aldi bilen yaponiye metbu'atliri arqiliq xelq'aragha tarqitildi. Xitay da'iriliri ilgiriki sot qa'idiliridin perqliq halda yaponiyilik ikki muxbirning sotqa qatnishishigha ruxset qilghan, emma sot meydanida xatire qaldurushini chekligen.

Sotqa qatnashqan yaponiye soda géziti muxbirining xewer qilishiche, jinayet gumandari lu yöting özi yétekchilik qilidighan xébiy tyenyang yémeklik shirkitining yaponiye qatarliq döletlerge éksport qilghan teyyar juwawilirining terkibide yémeklikning chirishining aldini alidighan déhqanchiliq dorisining ishlitilgenlikini iqrar qilip, tyenyang shirkiti ishlepchiqarghan juwawidin zeherlen'güchilerdin kechürüm sorap, sottin özige kengchilik bilen höküm chiqirishni telep qilghan. Yaponiye metbu'atlirining xewer qilishiche, sot hökümi téxi chiqirilmighan bolsimu, jinayet gumandari lu yötinggha 10 yildin yuqiri qamaq jazasi yaki ölüm jazasi bérilish éhtimali bar iken.

Xitaydiki zeherlik yémeklik mesilisi nöwette xitay puqraliri we xelq'ara jem'iyet yéqindin diqqet qilip kéliwatqan mesililerning biri. Xitayda ishlen'gen juwawidin zeherlinish weqesi 2008-yili 1-ayda yaponiyede yüz bergen bolup, eyni chaghda juwawidin zeherlen'gen 10 nechche kishi heqqidiki xewer yaponiye metbu'atlirida élan qilin'ghandin kéyin, yaponiye terep xitay hökümitidin bu weqeni tekshürüshni telep qilghan. Weqedin kéyin yaponiye, koréye, amérika, kanada qatarliq döletler xitaydin import qilidighan yémekliklerni qayta tekshürüshni telep qilip, xitaydin kiridighan teyyar yémekliklerge cheklime qoyghan idi.